7 sikop sa drug op sa Calbayog City

SAMAR, Calbayog City--Pito ka indibidwal lakip niini ang tulo ka estudyante ug usa ka public school teacher ang nasikop sa anti-illegal drug operation sa kapulisan ug Philippine Drug Enfrocement Agency (PDEA)- Eastern Visayas.

Ang operasyon gihimo sa Purok 7, Mira Flor Subdivision, Barangay Dagum, dakbayan sa Calbayog, Samar, alas 2:30 Lunes sa kadlawon, Marso 18.

Gawas niini, napuhag usab sa kapulisan pinangulohan ni Police Chief Inspector Michael Oraller ug Agent Silas Aurelia sa PDEA- Eastern Visayas ang usa ka drug den nga gimintinar sa usa sa mga dinakpan.

Matod ni Police Superintendent Joie Pacito Yape Jr., kinsa nidumala sa operasyon, tuyo sa mga awtoridad ang usa ka Grade 7 nga si Rolando Aclado Jr., 20.

Human pagsikop sa subject, gisunod pagpuhag sa awtoridad ang drug den diin nasikop sila si Teofilo Jason Aclado, 35, maestro; Joselito Estrelles, 21, Grade 8; Alberto Emparado, 23, Grade 10; Junjun Duraman, 19; Marlom Moriles ug ang tag iya sa drug den nga si Rolando Aclado Sr.

Nakahimo usab sa pag eskapo ang usa ka Jun Felices.

“Kana siya family business na gud na. Kanang maestro nadakpan nana kaniadto sa drugs ug may pusil sab pero on bail na karon,” matod ni Yape.

Naa na sa listahan sa drug enforcement group ang mga nasikop nga Aclado hinungdan nga gilusad ang operasyon.

Nasakmit sa operasyon ang tulo ka dakong pakete sa gituhoang shabu, usa ka sachet nga may residue sa shabu, paraphernalia, cellphone, salapi nga P1,630 ug laing P1,000 nga marked money.

“Ongoing pa ato investigation diin og supply ang subject pero sa pagka karon di lang usa nato i-sulti ang mga impormasyon nga nakuha namo kay basin ma burnout,” matod ni Yape.

Giawhag sa kapulisan ang publiko nga padayung mo tabang kanila sa pagsumpo sa ilegal nga droga ug di mahadlok sa pag report sa awtoridad. (JKDP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph