GIANGKON sa inahan ni Christine Lee Silawan nga naglibog na siya human sa mga nanggawas nga balita sa niaging'semana sa giingon nga nasikop ang nipatay sa iyang anak.

Adtong niaging semana, nadakpan sa mga sakop sa National Bureau of Investigation (NBI) ug Criminal Investigation and Detection Group (CIDG) sa siyudad sa Davao si Jonas Bueno nga gidudahan nagpatay ni Silawan.

Pero gidakop si Bueno tungod sa iyang kalabutan sa pagpatay sa usa ka mag-uuma sa siyudad sa Danao ug dili ni Silawan, nga hugtanon niyang gihimakak nga naa siyay kalabutan niini.

Ug karon lain na usab ang nasikop sa NBI Central Visayas nga maoy gitudlo nga prime suspect sa kamatayon sa iyang anak.

Dugang ni Lourdes Silawan, inahan sa maong biktima, nga madakpan man ang nipatay apan ang gikinahanglan sa ilang pamilya ang unta buhi pa ang 16-anyos nga anak, kinsa alang kaniya taas pa unta og maabot alang sa kaugmaon niini.

Buot man ipangutana sa inahan kon ngano nabuhat sa mamumuno ang brutal nga pagpatay sa anak, apan mag- agad usab siya sa awtoridad kon personal ba siya nga paatubangon sa gitudlo karon nga prime suspect ang usa ka 17-anyos nga lalaki.

"Ang akong gibati, dili gyud ingon totally nga komportable nako, kay ngano, bisan kon siya nadakpan na siya, bisan kon siya na gyud ang tinuod nga kriminal, taas paman gud unta ni siya (Christine Lee) og kaugmaon, makab-ot pa unya niya ang unsay gusto nya nga pangandoy Sa iyang kinabuhi, dili unta ingon ana bah. Lahi ra oyy, kita naglantaw man gani ta sa kaugmain sa atong anak, ako naglantaw ron sa namatay nga damgo sa akong anak," pamahayag ni Lourdes sa Superbalita Cebu. (FMD)