GIKAN sa 14 ka mga giila nga priority barangay sa kapulisan sa dakbayan sa Mandaue, alang sa ipatuman nga seguridad atol sa piniliay, niabot na ni karon sa 21 ka barangays.

Daan na nga gipahibalo ni Mandaue City Police Office (MCPO) director, Police Col. Julian Entoma, nga aduna silay giila nga 14 ka priority barangay sa syudad alang sa umaabot nga piniliay, isip maoy nakab-ot sa ilang Joint PNP-AFP election workshop sa miaging semana.

Niadtong Sabado, atol sa tibuok adlaw nga Regional Joint Security Control Conference sa Police regional Office 7, matud ni Entoma nga nasabutan nga imbes nga 14, mahimo na kini nga 21 ka mga barangay.

Kay imbes nga gikan sa 5,000 pataas nga mga botante, ang pag-ila magsugod na sa mga abangay nga adunay 3,000 pataas nga mga botante.

Giklaro ni Entoma nga tungod kini, kay sa mga niagi nga piniliay, green level status lang kun normal lang ang seguridad nga gipatuman diha sa syudad sa Mandaue panahon sa mga election.

Apan sa pagkakaron nga anaa na sa yellow alert level status sa election watchlist areas ang syudad, angay lang ang maong pagpangandam.

“Ang rason ana kay ang Mandaue City, niadtong previous nga election, kon sa color coding, green man unta to, wala ray problema. Then karon, ato nga gi-categorize nga as yellow, among nakita, based pud sa atong workshop with AFP, para sa security deployments, nga ang mga barangay nga adunay mga botante nga 3,000 above, sahay magka-problema nana sama sa pagpahiluna sa ilang mga voters’ list diha sa ilang polling centers, kay magtapon na bitaw, unya ang atong police ma-outpower na gyud. Dili na makita,” pagpasabot ni Entoma.

Dugang pasabot ni Entoma nga gikan sa duha ka mga pulis nga maoy magbantay sa mga matag tunghaan, kun polling centers, mahimo kini nga upat.

Gani kon tag-as ang mga koral sa mga tunghaan, adunay ipahimutang nga riser ang mga pulis, diin sila mag-monitor ug aron mapakgang dayon kon ugaling adunay magtinguha nga maghimog kagubot, sa su’d sa mga polling centers.

Samtang dili sama sa ubang mga probinsya sa rehiyon, kinsa mipatabang sa ilang mga barangay tanod isip force multiplier, matod ni Entoma nga dili kana nila himuon, aron dili masagulan og pamulitika.

Human nga kadaghanan sa mga kapitan sa barangay sa syduad sa mandaue ang aduna gyud gisuportaran nga mga politick.

Ang unang 14 ka mga barangay mao ang Paknaan, Labogon, Subangdaku, Canduman, Banilad Umapad, Looc, Maguikay, Tipolo, Tabok, Pagsabungan, Cabancalan, Alang-alang ug Casuntingan, kinsa una nga giila nga adunay 5 mil ug pataas nga mga botante.

Sunod niini ang mga barangay Ibabao Estancia, tawason, Cubacub, Basak, Jagobiao, barangay Opao ug Bakilid, nga aduna usay 3,000 pataas ka mga botante.

Ang pwersa sa MCPO ang adunay 400 ka personnel, lakip na niini ang gidugang gikan sa Naval Forces of Central Visayas, alang na sa piniliay karong Mayo.

Ang maong report ang i-sumite sa MCPO ngadto sa ulohan nga buhatan alang usab sa pag-aprubar gikan sa Comelec.