Todino: Dagkong plaka sa motorsiklo

GIPERMAHAN na ni President Duterte ug balaod na karon ang pag-require sa motorsiklo nga butangan og duha ka plaka – sa atubangan ug sa likod.

Ang plaka kinahanglan dako ug mabasa bisan sa gilay-on nga 15 metros. Unya dunay kolor niini dependi sa rehiyon diin narehistro ang motorsiklo.

Miangal ang mga riders og motorsiklo. Matod nila peligro ang pagbutang og dakong plaka sa atubangan. Dili luwas ang drayber kay panahon nga matangtang ang plaka mameligro ilang pagmaniho.

Ang nagpanday sa balaod nga sila si Senador Dick Gordon ug Vicente Sotto III ming-insister paagi kini aron kaminusan ang kremin. Daghang nang mga kaso diin gigamit ang motorsiklo sa mga riding-in-tandem paghimo og krimen.

Si Presidenti Duterte, nga mismo mahilig sa motorsiklo, misuporta sa maong balaodnon. Gani, niadto pa diayng Marso 8 iyang gipermahan.

Sa matag balaod dunay bentaha ug duna say disbentaha. Alang sa mga riders dili kini maayo ug dili kini maoy tubag aron masulbad o kaminusan ang kremin gamit ang motorsiklo.

Basi sa ihap dunay 6 milyones ang nanag-iya og motorsiklo sa nasod. Apan nakaseguro ta nga dili tanan misupak aning balaod.

Kon alang sa kahapsay ug kalinaw sa katinglingban, nan, walay katarungan nga supakon nato ang balaod.

Kanang katarungan nga makompromiso sa safety sa mga riders kon butangan og dakong plaka sa atubangan taphaw kaayo. Naay mga motorsiklo nga miapil og mga karera, ilang mga numero gibutang sa atubangan, dagko kaayo, kusog ilang dagan, wa man lagi sila mangreklamo!

Ang wala gibutyag sa tiunay nga katarungan niining nagsupak sa balaod mao nga dili sila gusto nga but-an ang pagpanindot sa ilang sakyanan. Kon mahimo, gusto nila walay plaka aron makabuot sila kon unsay ibutang nga dekorasiyon diha sa motorsiklo. Di ba? O Dili lang gyud sila gusto nga dali lang mailhan kay plastada na kaayo ilang plaka.

Sa labing moderno nga nasod, pananglit sa Amerika o Englatera, dili gyud dakong isyu kining pagbutang og plate number. Ang mga motorista sa maong mga dapit, di man moangal kon mao kana ang gimbut-an sa balaod.

Daghan mga Pinoy nanarbaho gawas sa nasod ug nagmanihog mga sakyanan, motorsiklo o kotse o truck. Disiplinado kaayo sila ug matinumanon sa balaod. Dinhi sa Pilipinas, bisan unsay lakang himoon sa gobiyerno, supakon kanunay.

Pero, dili kaayo ta kombensido sa rason sa gobyerno nganong kinahanglan gyud ang dagkong plaka. Nakaseguro ba sila nga mominus ang kremin tungod ani?

Ang ato lang dinhi mao nga kon seryoso gyud ang gobiyerno alang sa safety sa mga motorista, ipatuman nato ang batakang balaod sa trapiko.

Kinahanglan sobsob ang kampaniya sa overspeeding, pagsul-ob og helmet ug labaw sa tanan, kining pag-inspeksiyon kanunay sa kondisiyon sa sakyanan.

Daghan man gud nga aksidenti mapugngan unta, ilabi na kining mawad-an og preno, kon nasuta pa ang kahimtang sa sakayanan.

Mas maayo pud unta ayohon na kining mga libaong sa mga karsada. Mao niy pipila ka mga hinungdan sa disgrasya labi sa nagmotorsiklo. Tungod sa dagkong lungag mokalit lang ka tiurok ug kalamba ang motorsiklo. Unya ra ba dili gyud manubag ang gobiyerno sa responsibilidad.

Okay, padak-an nato ang plaka, apan padak-an sab unta ang paningkamot pagpatuman sa balaod ug pagmintenar sa maayo sa mga karsada.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph