PAINGON na unta mopauli ang managtiayong Rugas dihang naaksidente kini ug diha-diha namatay sa national highway sa Barangay Atabay, lungsod sa Alcoy.
Ang managtiayon giila nga sila si Patrick John, 33, ug si Sheryl, 33, residente sa Sitio Poo, Barangay Balud, lungsod sa Dalaguete.
Gikan sa Dumaguete ang managtiayon nga sakay sa motorsiklo ug paingon na unta sa Dalaguete, habagatang Sugbo.
Samtang ang Ceres bus nga gimaneho ni Renato Paglinawan Mojado, 41, paingon sa pantalan sa Bato, Liloan, lungsod sa Santander.
Sa imbestigasyon ni SPO1 Job Sarvida nga anaa sa managlahing lane ang motor ug ang bus.
Pasado alas 2:00 sa hapon kagahapon dihang nahitabo ang aksidente.
Apan wa pa matino sa kapulisan kon unsay nahitabo nganong napasok ang magtiayon ilawom sa bus.
Samtang nakaangkon og nagkadaiyang samad sa parte sa lawas ang duha hinungdan sa kamatayon niini.
Dugang ni Sarvida nga posibleng giduka si John Patrick nga mao ang nagmaneho sa motorsiklo hinungdan nga nahitabo ang aksidente.
Ang magtiayon dunay usa ka anak.
Gitanggong sa prisohan ang driver samtang anaa sa kapulisan ang kustodiya sa Ceres Bus alang sa dugang imbestigayon. HBL