HUMAN nagpagawas si Presidente Rodrigo Duterte sa listahan sa mga narco- politician dinhi sa nasod namahayag ang Department of Interior and Local Government (DILG) – Northern Mindanao nga hangtod dili pa makonbikto mahimo silang magpapili sa umaabot nga piliay.
Gibutyag ni Regional Director Arnel Agabe, nga anaa na sa mga botante kung maapektuhan ba sila sa gipanganlan ni Presidente Duterte.
Gani sila mismo nagpahimangno sa mga botante nga mopili sa insakto, kung lantaw nilang dako ang kalambigitan niini sa pagpayuhot sa ginadili nga druga daw ang mga botante na maoy mohusga kanila pag-abot sa piliay.
Sa Northern Mindanao, upat ka mga pulitiko ang ginganlan ni Presidente Duterte, nga pulos nagikan sa probinsya sa Misamis Occidental.
Matud ni Agabe nga ang katawhan adunay dakong katungod sa pagpili apan dili sila mohunong sa pagpahimangno nga pilion kadtong matarong ug angayan sa posisyon.
“Magdepende gihapon kung unsay awareness sa atong voters unsay ilang pagtan-aw sa announcement ni Presidente Duterte. Ang atoang reminders pirme sa atong mga voters nga ang pilion nato sa umaabot eleksyon kadtong magagaling mahuhusay at matitinong local official,” matud ni Agabe.