USA ka 6 anyos nga batang babaye ang giingong gilugos ug gisulayan og hulog sa langob sa usa ka 74 anyos nga lalaki sa Hilltop, Barangay Macasandig, dakbayan sa Cagayan de Oro, niadtong alas 3 Dominggo sa hapon, Marso 17.
Nasikop si Dominador Jumawan, ulitawo, residente sa susama nga dapit human nakapangayo og tabang ang 13 anyos nga nakasaksi sa hitabo.
Sa inisyal nga impormasyon unang nag-inom si Jumawan ug gihagad ang 6 anyos nga bata nga mouban sa ilang balay apan giingong gidala kini sa kasagbutan nga bahin.
Nasayran nga kini si Jumawan naila nga tatay-tatay sa mga bata sa maong dapit.
Gibutyag ni Police Sr. Insp. Teodoro de Oro, hepe sa Police Station 9 sa Macasandig, nga nadungog ni Police Officer 2 Jacky Jumo, kinsa nagpuyo ra usab sa maong dapit, ang pagpangayo og tabang sa 13 anyos.
“Natingala na ang bata nga sa kasagbotan nga bahin siya gidala, gihubo iyahang sapot sa ubos nga bahin ug gi-attempt pa siya og hulog sa langob kay naa daw langob didto sa taas maygani nabantayan sa atong police nga naay nagsinggita nga mga bata,” matud ni de Oro.
Giingong posibleng plano sa suspek nga patyon ang bata ilabi na nga gisulayan pa kini pagbunal og bato.
“Posible kay ang bata naka-istorya pud sa atoa nga hapit daw siya gibunalan og bato maygani nga niabot ang iyahang kauban nga 13 anyos mao to nga wala na ma-igo kay iya mang gisinggitan,” dugang niini.
Dako usab ang posibilidad nga nahilabtan ang bata human nga napalgan kining hubo na ang sapot sa ubos nga bahin ug ang suspek ang gipataas na ang iyahang zipper.
Samtang hugot nga gipanghimakak sa suspek ang alegasiyon gumikan kay gauban-uban lang ang bata kaniya ug andam kini nga ipa-medical ang bata.
Gidugang pa niini nga wala kini panagbingkil sa mga ginikanan sa biktima ug wala kini intensiyon nga patyon ang biktima gani wala kini nasayod nga dunay langob sa maong dapit.
“Wala nako na lugosa uy, gauban uban ng mga bata sa ako di lang kay siya daghan kana nga mga bata, kanang mga bataa matulog ko magtapad na sa akoa, willing kaayo ko ipa medical nila aron mahibaw-an gyud,” matud ni Jumawan.
Ang suspetsado ang kasamtangang anaa na sa mini-cell sa Police Station 9, samtang ang bata gitakdang ipa-ilalom sa eksaminasiyon.