NALUWAS sa usa ka palak ang host New York Knicks sa ilang makutas nga kadaugan batok sa Los Angeles Lakers, 124-123, kagahapon sa National Basketball Association (NBA).
Sa katapusang posisyon nila sa bola sa himatyong segundos, ang Lakers, sama sa gilauman, mingsalig sa ilang lider nga si LeBron James nga makaagak kanila.
Gidala ni James ang bola unya dihang nakakita siya og kahigayunan, milusot ang four-time MVP ug dayong itsa sa bola sa nahabiling 2.3 segundos apan napalakan siya ni Mario Hezonja nga maoy nakapreserba sa kadaugan sa Knicks.
“To beat a great player, sometimes you’ve got to do the unexpected and you’ve got to make big plays,” matod ni Knicks coach David Fizdale, “because you know that they’re gearing up to make a big play.”
Ang Lakers naglabaw og 11 puntos sa nahabiling 3:30 minutos dihang gipahugtan og maayo sa Knicks ang ilang depensa ngadto kang James.
Adunay higayon sa hinapos nga bahin nga napalakan sab ni DeAndre Jordan ang itsa ni James.
Ang depensa sa Knicks maoy nakahatag kanila og kahigayunan nga makamugna og 13-1 nga rally sa hinapos nga bahin nga maoy nagpadaog kanila.
Nakapupo man tuod si James og 33 puntos apan igo lang kining mitali og 4-of-15 fieldgoal sa 4th quarter.
“He just missed shots,” matod ni Hezonja sa duwa ni James sa 4th quarter.
Kon buot hunahunaon, si Hezonja usa gyud sa mga rason nga daghan og sipyat si James sa 4th quarter gumikan sa iyang depensa.
Si Hezonja, kinsa mao pa lay pagbalik og duwa gikan niadtong Pebrero 13, maoy gitahasan sa Knicks sa pagbantay kang James hilabi na sa hinapos nga bahin.
Ang Knicks, nga nahimutang sa labing ubos sa standing dala ang 14-56 nga rekord, gipangulohan ni Emmanuel Mudiay pinaagi sa iyang 28 puntos. Aduna pa’y laing upat ka mga magduduwa ang Knicks nga nakamugna og dobleng numero nga puntos.
Ang Lakers, nga nahagsa sa 31-39 nga rekord, gikonsiderar nga inilog ning kombatiha ug ilaha kining nabarugan hangtod na sa tungatungang bahin sa 4th quarter.
Ang jumper ni James sa nahabiling 3:44 minutos maoy nakahatag sa Lakers og 122-111 nga labaw.
Human human niini, kalit lang ning-rally ang Knicks aron ilugon ang kadaugan.
“We didn’t close the game out. Being the competitor that I am, it bothers me that I didn’t make enough plays down the stretch. It bothers me that I didn’t even get a shot at the hoop. Of course that stuff bothers me,” matod ni James.
Sa laing duwa, mitipig og 25 puntos si Chris Paul, ug iyang natupngan ang career high nga unom ka triples, 10 ka assists sa dihang gilubong sa Houston Rockets, 117-102, ang Minnesota Timberwolves.
Midugang og 20 si James Harden ug 10 ka assists bisan pa man og may gipamati kini sa iyang liog ug laing 20 puntos ug 13 ka rebounds ang natampo ni Clint Capela.
Si Karl-Anthony Towns miyagyag og 22 puntos ug 10 ka rebounds alang sa T-Wolves.
Gilupig sa Philadelphia Sixers ang Milwaukee Bucks, 130-125; gipakaging usab sa Detroit Pistons ang Toronto Raptors, 110-107.
Gipagtong sa Miami Heat ang Charlotte Hornets, 93-75; ug gipatugpa sa Orlando Magic ang Atlanta Hawks, 101-91. (AP, ESL)