NAGTUBO sa kaharuhay si Ben. Sukad sa pagkamatngon niyag buot nahibawo siya nga si Mama Lina niya naminyo og Aleman. Buhong siya sa mga butang nga mapalit sa salapi. Tua sa Germany nanimuyo ang iyang Mama ug ang bana niining si Frank. Anak si Ben sa pagka dalaga sa iyang mama. Ang nakapaanak sa iyang mama guwapo nga lalake apan grabe katapulan tawhana. Dili gusto motrabaho. Pangporma sa mga tsiks ang hilig. Giipon kadiyot si Lina ni Elias, amahan ni Ben, nga nagsalig gihapon sa iyang ginikanan nga maoy nagsustento niya. Pagkahibawo ni Lina nga ikalima siya nga pinaangkan ni Elias, milayas siya dala ang puya pa nga si Ben. Gisuwerte hinuon si Lina kay naibgan sa usa ka Aleman ug gidala siya sa Germany.
Didto sa Germany nakatrabaho si Lina sa usa ka banko kay gradwado man siya sa B.S. Accountancy. Kaduha sa usa ka tuig si Lina nga makauli sa Pilipinas, sa Hunyo ug Disyembre.
Buhong si Ben sa sinugdanan. Pag-abot niya sa hayiskol, utso mil pesos ang alawans sa pag-eskuyla. Ug kay daghan og kuwarta si Ben daghan siyag mga higala. May nakagalgal nga mag-shabu. Dinhi magsugod ang kalbaryo ni Lina. Nakagradwar sa hayiskol si Ben human sa unom ka tuig. Hinangyuan ang iyang mga grado ug liningkuran kay suod ni Lina ang magtutudlo ni Ben.
Mikuha og kursong Aeronautics si Ben, kay lagi husto sa barog ug ambungan, angayan nga mag-piloto. Apan usa ka tuig ra gayud siyang mibalik-balik ug duha ka semester sa first year, Way gipasaran. Gipaeskuyla na lang sa TESDA sa pagka welder. Apan mao gihapon. Dunay klasmeyt nga adik sab og shabu. Maoy kumprador si Ben og shabu Naka-klasmeyt siya og babayeng adik sab. Gipuyo ni Ben sa balay sa iyang Mama sa baryo Hubakod ning dakbayan. Duha ka tuig nang wa makauli sa Pilipinas ang iyang mama, kay nakig-diborsiyo kang Frank. Palahubog si Frank ug himabaye. Nakakita og mga batan-on ug mas guwapa, gisigihan lag kulata si Lina. Wa sila kaanak kay gi-vasectomy na ang Aleman.
Karon bayinte mil pesos na ang padala ni Lina kang Ben kada bulan. P10,000 alang kaniya; ang laing P10,000 para sa puya nilang Perla, nga si Cynthia. Pagkamatikod ni Ben nga gihukhukan lang siya ug ang iyang Mama Lina ni Perla, gihinginlan niya kini. Milayas si Perla nga dala ang ilang anak. Karon, kulang gihapon ang P20,000, ang binulang padala ni Perla ngadtong Ben, kay barkadista si Ben. Kanunay siyang mobangka og shabu sa iyang mga barkada.
Aron makadaginot si Ben. gilimitahan ni Lina ang iyang kuwarta padala matag bulan. Utso mil na lang. Ang maong kantidad di abtan og upat ka adlaw.
Nag-teks na sab si Ben kang Lina nga kulang iyang kuwarta.
“Wa na koy ikapadala. Sunod bulan na sab,” teks ni Lina kang Ben.
“Kon di ka makapadalag ensakto, maghikog ko!” teks ni Ben.
“Mas maayo pa! Aron mahunong imong kainutil nga pagka anak! Aron mahipos ka!” Nagtulo ang luha ni Lina nga nag-teks balos sa iyang anak. Unya mituaw siya sa hilom, ‘Makapainutil gyud diay sa tawo kon kanunay lang magdawat og kuwarta nga dili niya hinaguan!’ (KATAPUSAN)