MATAG sekta, organisasyon, gobyerno ug bisan ang indibiduwal adunay tinaguang hambog. Lagi kay tawo ra man sab ang nagdala sa mga grupo, di malikayan nga mogawas ang hambog.
Tawhanon kini nga kinaiya nga makuha nato sa atong mga ginikanan, eskuwelahan, simbahan, silingan, media ug sa kasikas sa atong sosyedad.
Dunay kanta si Max Surban nga pataasay sa hambog sa mga Cebuano, Ilonggo, ug Waray nga sayod ko nga kahibalo namo.
Di malupigan ang Genuine Ilonggo (GI) kay ginapiko ug ginapala ang ilang kuwarta.
Sama namong mga Bol-anon nga mouli matag Hunyo sa Bohol aron mamista, mouli pod ang mga GI aron mopa-renew sa ilang tikal. Inig adto namo sa Bohol, kinahanglang magsul-ob mi'g jacket nga gama sa maong bisan kung gikan sa ukay-ukay ug alahas nga gagilakgilak aron ipakita nga gikan kami sa Mindanao nga buhong sa bulawan.
Ang taga Naga ug Sequijor mouli sab sa ila matag semana santa aron i-renew ang ilang habak, talisman, lana, anting-anting ug agod-agod kay basin masuhong sa kontra.
Ang ubang taga-Manila nagtuo nga sila ray taga-dakbayan ug hari sa Pilipinas.
Tanang tawo nga dili taga Manila ilang tawagon og probinsiyano, taga-bukid ug baduy.
Samot nga kung mailhan ka nga taga-Mindanao, ilang tawagon og Bisaya, Moros ug mas sakit pa, terorista.
Mas mogawas ang hambog karong panahon sa eleksiyon.
Mas nakalamang ang kandidato nga sikat nang daan kay di na nila kinahanglang maghambog pa. Nakapabor sab ang kandidato nga nakalingkod nang daan ug kugihan kay puwede nilang ipanghambog ang ilang agi sama sa balaod nga ilang gibuhat.
Lisud sa mga bag-ong kandidato ilabi na sa nasudnong posisyon kay kinahanglang ipakita nila nga may pormula sila sa pagsulbad sa daghang problema sa katilingban.
Gawas kung aduna silay napakitang talagsaong nabuhat sa wala pa sila modagan, dili dali ang pagdaug. Mao nga kinahanglang magpataasay sila sa hambog. Kay lagi kulang sa agi, kinahanglang iladlad nila ang ilang nahuman sa eskuwela, trabaho, talagsaong nahimo sa ilang pamilya, lugar o nasud.
Kung walay nahimo, ilang ipanghambog ang nindot nga adbokasiya sa ilang grupo sama sa plano nilang pagtabang sa kabus ug dinaugdaug.
Kasagaran sa ilang adbokasiya kay nagpunting sa pagsulbad sa problema sama sa kapobrehon, walay trabaho, pag-abuso sa tawhanong katungod, pag-angkon sa yuta ug yutang kabilin, pag-atiman sa kinaiyahan, pagprotekta sa katungod sa bata, babaye ug hayop, pagwagtang sa kurapsiyon, pagpakaylap sa kalinaw, ug uban pa.
Sa pagkatinuod, naanad na ang tawo sa hambog gikan sa kandidato. Di na daw sila mailad sa pagpa-epal sa kandidato kay daan na silang nailad.
Mas nindot sab daw nga naay manghambog kay lingaw ug aron naa silay sawayon.
Maayo unta kung ipakita na lang sa buhat ang ilang hambog.