TACURONG CITY -- Hangyo sa pamilya sa 5-anyos nga gilugos ug gipatay sa iyang uyoan ngadto kang Pangulong Rodrigo Duterte nga ibalik ang death penalty ug unang patilawon ang suspek.
Sumala pa nga anaa sa impluwensiya sa gidiling druga ang uyoan kinsa milugos ug mipatay sa iyang pag-umangkon niadtong milabay nga semana.
Ang suspek giila nga si Arly Castro, 28, ulitawo ug molupyo sa Purok San Isidro, Barangay San Rogue, Palimbang, Sultan Kudarat.
Kahinumdoman nga pauli na sa iyang balay ang 5-anyos nga biktima gikan nagtungha sa Sto. Nino Day Care Center apan giatngan sa uyoan nga si Castro.
Giguyod sa suspek ang bata paingon sa hilit nga dapit ug gilugos pagkahuman gipatay.
Nakaplagan sa kanal ang patay nga lawas sa biktima nga nakaangkon og grabeng bun-og sa nagkadaiyang bahin sa lawas ug gituok pa gayud.
Samtang giangkon ni Castro nga siya ang milugos ug mipatay sa iyang pag-umangkon apan wala siya kabalo paunsa niya nahimo ang krimen. (Edgar E. Fuerzas)