MITUGPA sa balay tambalanan ang usa ka 17-anyos human dunggaba sa laing grupo sa mga batan-on Dominggo sa kaadlawon didto sa Torres Street, Barangay 9-A, Davao City.
Usa ka alyas John, 17-anyos, residente sa Kilometro 23, Mahayag, Bunawan dakbayan sa Davao ang gidali og dala sa Southern Philippines Medical Center (SPMC) gumikan sa samad dinunggaban sa lawas.
Nasayran nga kauban sa biktima ang iyang uyab kinsa kanhi uyab sa lider sa grupo sa gang.
Dihang nasiplatan ang biktima, daling miresbak ang kaubanan sa kanhi boyfriend dayon hansak sa mahait nga butang.
Human sa hitabo daling nanagan ang grupo sa mga batan-on sa wa matino nga direksyon samtang gidali og dala sa ospital ang biktima.
Pahimangno sa kapulisan nga subayon sa mga ginikanan ang ilang mga anak ug di na palakwon sa dis-oras sa kagabhion. (Richy F. Nalagon)