MIAKSYON na og kalubog ang pagpangita sa hustisya sa linuog nga kamatayon ni Christine Lee Silawan sa Barangay Bangkal, dakbayan sa Lapu-lapu.
Kini tungod kay duha ka ahensiya sa mga tinugyanan sa balaod ang adunay managlahing suspek nga daw sa dili sab katuohan.
Kagahapon, ang National Bureau of Investigation (NBI)-7 miinsister ug mikompirmar sa pag-aresto sa usa ka menor-de-edad nga kanhi hinigugma ni Silawan.
Gani si Atty. Tomas Enrile, director sa NBI-Central Visayas, mibutyag nga ang maong 17-anyos nga suspek miangkon nga siya ang nagpatay sa 16-anyos nga Silawan tungod sa pagpangabubho.
Dugang ni Enrile nga mitug-an na usab ang suspek kon si kinsa ang iyang mga kauban sa maong krimen, ug kini maoy gihimo-an karon og follow-up operations.
Nindot man tuod paminawon nga aduna nay suspek nga natumbok kalabot sa maong kamatayon, apan imbis hangopon sa kadaghanan, naghatag man hinuon kini og daghang pangutana nga nakapaduda.
Unsa may gibasehan sa NBI nga kining bataa nahimo nilang suspek ug unsa may iyang kapabilidad nga makahimo siya sa ingon atong klase sa pagpatay?
Hanas nga mipanit sa nawong, miputol sa dila, ubol-ubol, ug gihiwa pa gyud ang tuo nga dawunggan niini. Kini gawas pa sa 30 ka samad dinunggaban.
Kon atong sakyan nga pagpangabubho ang hinungdan, dili ba diay igo na kaayo ang ordinaryong pagpatay?
Sa sayo pa, laing suspek nga usa ka Jonas Bueno ang gisikop sa mga otoridad didto sa Davao City.
Sa gihapon, way igong ebendensiya nga magtumbok kaniya nga nalambigit sa kamatayon ni Silawan.
Sa ato pa, sa pagkakaron, usa lang ka butang ang maklaro. Kini mao nga sa duha ka ahensiya, dunay nagpatakag panguha og suspek sa rason nga sila ray nahibawo.