GUMIKAN sa nagnihit nga suplay sa tubig, ang Metro Cebu Water District (MCWD) nangita og dugang suplay aron maoy itapak sa nihubas nga tubod gumikan sa El Niño.
Si Charmaine Rodriguez-Kara, public information officer sa MCWD, niingon nga nagkuwang og 15,000 cubic meters nga suplay ang MCWD resulta sa grabeng kainit.
Atol sa tigom nga gipatawag ni Konsehal Dave Tumulak sa dakbayan sa Sugbo, nitanyag ang Mactan Rock sa ilang kaandam paghatag og dugang suplay.
Ang Mactan Rock nga gipanag-iya ni Antonio Tompar adunay planta sa Lapu-Lapu ug laing usa nga nahimutang sa North Reclamation Area nga nagsuplay og 4,500 cubic meters.
Si Tumulak niingon nga adunay laing planta ang Mactan Rock sa barangay Basak San Nicolas, Tejero ug Lahug.
Gumikan hinay nga suplay sa tubig, apektado ang barangay Sambag 1, Sambag 2 ug Cogon Ramos diin moagas ang ilang gripo alas 3 hangtod alas 6 sa buntag samtang alas 6 sa gabii hangtod alas 7 sa buntag ang barangay Capitol Site.
Ang MRII nitanyag usab pag-treat sa mga tinubdan sa tubig sa barangay Apas nga naapektohan sa taas nga nitrate.
Si MCWD General Manager Jose Eugenio Singson niingon mga kon makaya sa budget sa water district ang presyo sa treatment, molagda sila og kasabutan diin 2,000 cubic meter marag adlaw ang madugang nga suplay sa tubig.
HANGYO SA MGA MAYOR
Nangaliyupo si Tompar ngadto sa mga mayor sa dakbayan sa Lapu-Lapu, Talisay ug Minglanilla para hatagan na ang iyang kompaniya og pagtugot nga maka-operate para makakuha og dugang suplay sa tubig.
Gipasalig ni Tompar nga kon mahatagan na sila og certificate of no objection nga iisyu sa local government unit, labing dugay upat ka buwan makahatag na sila og dugang tubig ngadto sa MCWD nga makaserbisyo og 26,000 ka mga balay matag adlaw. (PAC)