DUHA ka dagkong mga kompaniya sa konstruksyon ang ni-signify sa ilang intensyon nga mopatuman sa 73.7 kilometros nga Metro Cebu Expressway pinaagi sa public-private partnership (PPP).
Si Engr. Nonato Paylado, pangu sa planning and design division sa Department of Public Works and HIghways (DPWH) 7, nibutyag nipadala og suwat sa ilang buhatan ang Metro Pacific Tollways Development Corp., ang kompaniya nga nagtukod karon sa 8.5 kilometros nga Cebu-Cordova Link Expressway, ug ang China Construction First Group sa uwahing bahin sa 2018 kabahin sa ilang unsolicited proposal sa proyekto.
Sumala niini giduso na ngadto sa PPP service sa ilang ulohang buhatan ang intensyon sa duha ka mga kompaniya alang sa dugang evaluation.
“They intend to construct the whole stretch, including the remaining of segment 3 and that depends the evaluation of the department,” sigon ni Paylado atol sa unang quarter meeting sa Metro Cebu Development and Coordinating Board (MCDCB) niadtong Lunes, Marso 18, sa Capitol social hall.
Matod ni Paylado, mas paspas ang ilang paghuman og tukod sa proyekto kon itandi sa unsay nalatid sa feasibility study.
“Lesser siya probably mga more or less four years. You can just imagine if they will be able to shorten it, four years, dako nana nato,” pamulong ni Paylado.
Siya nidugang nga mas mapamub-an usab nila ang gitas-on sa proyekto gamit ang ilang high-tech nga kagamitan kon itandi sa nalatid sa feasibility study nga taas ang stretch tungod kay naglikoliko ug gisunod ang kabukiran.
“Pero they will adapt tunnel so that it will be straightened out and straighten out a certain section, shorten na siya nga road. So, if you’re going to shorten the total length, you will also be able to shorten the duration,” dugang pagpasabot ni Paylado.
Sa samang tigom, gitug-an ni Paylado nga nasuspenso una ang pagtrabaho sa segment 3 ubos sa P300 milyones nga pundo alang sa 2018 nga nag-cover sa mga barangay Pangdan ug Cantao-an, siyudad sa Naga, gumikan sa mga isyu sa right of way sa mga luna nga maagian sa proyekto.
Siya nipasabot ang uban sa mga tag-iya sa kabalayan ug estruktura nga maapektuhan sa proyekto kay tax declaration lang ang gihuptan samtang ang uban wa gyuy legal nga mga dokumento.
“Like for example, naa kay balay nga naigo sa project unya wa kay klarong ownership, wa kay papel, unsaon man pagbayad, ma-technical sad mi,” pahayag ni Paylado. “But our legal significantly done with regard to acquisition of all the properties that has been affected. So, we have already an approved parcellary plan. We have already procured the third party appraisal. So, what is ongoing are the negotiations.”
Siya namahayag nga bisan kon nasuspenso ang pagtrabaho, apan nag-strategize sila pinaagi sa pagpaspas sa pagtrabaho sa mga dapit nga walay problema sa mga tag-iya.
Laing P300 milyones ang gigahin alang sa Metro Cebu Expressway ubos sa infrastructure program sa 2019 diin na-bid out na nila ang masulod niining pundoha apan, dili pa nila ma-award ngadto sa modaug nga bidder sanglit wala pa maaprobahi ang General Appropriations Act alang sa 2019.
Ang Metro Cebu Expressway adunay tulo ka segments. Ang segment 1, naa sa sentro, may gitas-on nga 26.8 kilometros gikan sa siyudad sa Talisay ngadto sa dakbayan sa Sugbo. Ang segment 2, may 29.799 kilometros nga gitas-on mao ang northern segment gikan sa siyudad sa Mandaue agi sa mga lungsod sa Consolacion, Liloan ug Compostela hangtod sa dakbayan sa Danao.
Samtang, ang segment 3 mao ang dapit sa habagatan nga nag-cover sa City of Naga ug lungsod sa Minglanilla. Aduna kini gitas-on nga 17.15 kilometros.
Base sa FS, ang proyekto mokantidad og P28.018 bilyones, apil na niini ang bayranan sa right of way ug civil works. Sa maong kantidad, P13.4 bilyones alang sa segment 1, P10.3 bilyones sa segment 2 ug P4.4 bilyones sa segment 3.
Ang expressway mas lapad kon itandi sa kasamtangang mga karsada gumikan kay unom kini ka lanes.
Si Paylado nidugang ang segment 1 kay una nang mag-six lanes samtang tag upat ka lanes lang usa sa segment 2 ug 3 nga naay center island nga equivalent sa duha ka lanes kon gikinahanglan ang pagpalapad.