HAGIT alang sa Land Transportation Office (LTO) 7 nga ipatuman ang bag-ong balaod nga Republic Act (R.A.) 11235 o ang Motorcycle Crime Prevention Act.
Ang maong balaod nga gipirmahan ni Presidente Rodrigo Duterte niadtong Marso 8, gisaway sa publiko hilabi na sa mga motorista kay daw dagko na ang mga plaka na unya sa ilang mga motor.
Ubos sa maong balaod gihulagway nga “secure and safeguard its citizenry from crimes committed with the use of motorcycles through bigger, readable and color-coded number plates and identification marks.”
Apan mismo si LTO 7 regional director Victor Caindec namahayag nga “challenging” nga ipatuman ang maong balaod hilabi na sa teknikal nga aspeto niini nga makita gihapon ang plaka sa gabii sulod sa 15 ka metros.
“Ang implementing rules wala pa man nahimo. Ang technical aspect ang lisod pa kay needed pa ma determine unsay sakto nga system sa pag identify visually sa plate at 15 meters distance, during nightime,” matod ni Caindec.
Dugang ni Caindec nga wala pa ang IRR sa maong balaod kini nagpasabot nga wala pa usab matino kon unsa ang size sa plaka unya sa mga motor.
“There was no official declaration on the plate size insofar as the signed law is concerned. Wala pa man IRR, or Implementing Rules and Regulations nga giapprove. Wa pa man gani na draft,” si Caindec sa Superbalita Cebu.
Tambag niini sa mga nisaway sa maong balaod nga huwaton ang IRR aron mahibaw-an ang sakto ug dili.
Ang Motorcycle Prevention Crime Prevention Act namugna tungod sa nagkadaghang kaso sa mga motorcycle riding-in-tandem ug uban pang mga krimen nga nalambigit ang motorsiklo.
Aduna’y multa nga P50,000 ngadto sa P100,000 ang motorista nga dili motuman sa maong balaod.
MGA REAKSYON
Lainlain ang mga reaksyon sa mga motorista niini.
Si Maclordie Reyes, 34, usa ka motorista, niingon nga “mas maayo gyud nga padak-an ang plaka para makit-an ug mahibaw-an gyud, dali ra ma-trace.
Matod ni Warbe Paquibot, 23, usa ka estudyante ug taga Dakbayan sa Lapu-Lapu nga siya uyon sa maong pagpadako sa mga plate number ug kini alang lang sa kaayuhan sa katawhan.
“Uyon raman ko kay kon matuman na para sad nas atong kaayuhan kay kasagaran man gamiton sa krimen motorcycle para dali ma identify ang plate number sa motor," pakigbahin niya.
Si Lemar Colicampo, 27, misaysay nga dili siya uyon niini tungod kay lain tan-awon ug sagabal sa motor.
Dungag niya nga bisan pa padak-an ang mga plate number, dili gihapon masakpan ang mga kriminal kon kini kinarnap lang ug dili ilaha gyung motor.
“Ang ilang angay buhaton kay di kay plate number... sila jud mismo nga taga eskina magbutang sila og mga pulis.” sugyot niya. (HBL ug Jolissa Mae Taboada, Correspondents)