UPAT ka mga tawo ang nangaangol, apil sa drayber, dihang usa ka bus nga pasaheroan natumba sa Barangay Valladolid, Dakbayan sa Carcar sa Lunes sa kaadlawon, Marso 18.
Ang aksidente gikataho nga nakamugna og duha ka oras nga paghuot sa trapiko sa national highway.
Si Police Officer 1 Francisco Saberon sa Carcar City Police Station niingon nga ang Ceres bus nga gimaneho ni Rolly Liala, 43, padung sa Dakbayan sa Sugbo luwan ang 39 ka mga pasahero dihang usa ka motorsiklo ni-overtake og kalit sa tuo nga bahin sa karsada mga alas 3:30 sa kaadlawon sa sityo Tubod.
Dihang iyang nakita nga magkapingki sila sa motorsiklo, si Liala kalit nga ni-apply og brake.
Apan nawad-an siya og control sa sakyanan, hinungdan sa pagkatumba sa bus sa wala nga kilid.
Sila si Liala, mga pasahero nga sila si Lorelyn Iñigo, 27; Wendell Lungayan, 23; ug Amay Camelo, 72, nangaangol sa aksidente.
Gipangdala sila sa Carcar City District Hospital alang sa dinaliang pag-atiman sa ilang mga samad.
Si Barili Councilor Julieto Flores, kinsa nakakita sa aksidente, niingon nga iya dayong gitawgan ang Carcar City Government aron pagtabang nga makuha ang bus kay naghuot na ang trapiko.
Matod ni Flores, nakamugna og kahuot sa trapiko sulod sa duha ka oras ang maong aksidente. (JKV sa Sunstar Cebu)