Diputado: Kataw-anan nga survey

DAGHANG naghinam-hinam niadtong miaging Biyernes sa resulta sa Bohol Poll 2019 diin ila nga gi-anunsiyo ang resulta sa survey sa mga kandidato sa Bohol.

Tuod man, ang Bohol Poll Survey Team, pinaagi ni Patpat Espiritu mipagawas sa resulta sa ilang survey.

Voters’ Preference for the province of Bohol, matod pa.

Human mogawas ang resulta sa ilang survey, nahimo na man hinuong kataw-anan ang maong poll survey.

Ngano man?

Sa mga kandidato pagka-gobernador, dunay resulta sa survey sa 1st District ug 3rd District.

Apan walay resulta sa 2nd District.

Naunsa man kini?

Pusot pusot dayon ang mga pangutana.

Og sa dihang wa gyod matubag ang mga pangutana, giulan dayon og batikos and Bohol Poll Survey 2019.

Daghan ang mipagawas sa ilang pagduda nga “pinalit” ang maong survey. Daghan ang misulti nga na-entonses na hinuon ang dungog ug pangalan sa HNU tungod sa maong “pinalit” nga survey.

Kusog mikuyanap ang maong mga pag-atake hangtod miabot ang panahon nga dili na gyod makaon pa sa iro ang mga banat sa mga katawhan.

Napugos og hatag si Patpat Espiritu sa iyang pamahayag pagka-sunod adlaw nga Sabado.

Miangkon si Patpat Espiritu nga nasayop siya kay wala niya maapil ang 2nd District tungod kay “nakalimtan” niya pag-apil ang mga pangutana alang sa maong distrito.

Miunsa man si Patpat Espiritu?

“In good faith, with all honesty, no malice, wa toyu-a makalimtan nako og suksok og questionnaire sa 2nd District, dugay nami aning buhata survey karon pa jud nisipyat.”

Susmariosep.

Imbes makuhaan ang kalibog, misamot na man hinuon.

Ngano man?

Katuhoan ba nga makalimtan ni Espiritu ang mga questionnaire alang sa 2nd District?

Katuhoan ba ang iyang “sipyat?”

Imposible kana, matod pa sa usa ka kanhi enumerator sa Bohol Poll.

Ngano man, akong gipangutana.

Sa dili pa namo i-submit ang resulta sa among assignment, kadaghan namo balik-balikon og review ang among gi-submit nga data. Inig dawat nila, ila na sab kining balik-balikon sa dili pa nila kami hatagan og approval.

Imposible nga makalimtan ang data sa 2nd District, kon naa man gani, midugang pa siya.

Sa pag-finalize pa lang sa maong survey result, nahibalo na daan si Espiritu nga kulang ang maong survey.

Nganong gipadayon pa man niya pag-anunsiyo ang resulta sa maong survey nga kulang man kini?

Nganong gi-anunsiyo pa man niya nga voters’ preference sa lalawigan sa Bohol nga sayop man kini?

Nganong wala man lang usa niya gi-oktaba ang pag-anunsiyo sa resulta hangtod makompleto niya ang ilang data sa tulo ka distrito sa Bohol?

Nganong nagdali man gyod si Patpat Espiritu pag-anunsiyo sa sayop nga resulta sa poll survey?

Tungod sa maong sipyat, daghan ang nagtuo nga dili katuhoan ang maong poll survey.

Pinalit ang maong survey o dili, daghan ang nangutana.

Walay makahatag og tubag, bugtong si Patpat Espiritu ra ang makatubag.

Dugang pangutana.

Kon duna pay survey nga pagabuhaton ang HNU Bohol Poll Survey, motuo pa kaha ang mga katawhan?

Kon dili mapirmahan sa Presidente ang 2019 national budget, madayon pa ba ang piniliay sa Mayo 2019?

Dili na, matod pa ni Kongresista Jose Panganiban Jr., Chair sa House Committee on Agriculture.

Re-enacted budget sa 2018 ang gigamit nga budget karon, matod pa niya.

Base sa maong annual budget, walay pondo ang gigahin alang sa piniliay og maoy hinungdan nga walay pondo nga magasto alang sa piniliay sa Mayo 2019.

Mahimo pa ba nga maghimo og special session ang House aron pag-usob sa maong budget?

Dili na kay bugtong ang Presidente lang ang makatawag og special session, pasabot ni Panganiban.

Kon dili mopatawag ang presidente, walay special session nga mahitabo, pasabot sa kongresista.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph