Lapu-Lapu City jail way kuryente

Nisamot ang ka-alimuot: Tulo na ka semana nga nag-antos ang mga binilanggo sa Lapu-Lapu City Jail, Sityo Soong, Barangay Mactan nga way linya sa kuryente human nga mibuto ang tulo ka transformer diin naggikan ang supply sa elektrisidad ang maong pasilidad. Ang paggamit og paypay maoy kasamtangan nga mihupay sa ka-alimuot ug ang paggamit og kandila panahon sa kagabhion. (SunStar  File Photo)
Nisamot ang ka-alimuot: Tulo na ka semana nga nag-antos ang mga binilanggo sa Lapu-Lapu City Jail, Sityo Soong, Barangay Mactan nga way linya sa kuryente human nga mibuto ang tulo ka transformer diin naggikan ang supply sa elektrisidad ang maong pasilidad. Ang paggamit og paypay maoy kasamtangan nga mihupay sa ka-alimuot ug ang paggamit og kandila panahon sa kagabhion. (SunStar File Photo)

SULOD na sa tulo ka semana nga nag-antos ang Lapu-Lapu City Jail nga way elektrisidad sa dihang tulo ka transformer sa area ang nibuto sayo ning buwana kay matod pa gumikan sa overloading.

Tungod niini apektado ang operasyon sa prisohan nga nahimutang sa Sityo Soong, Barangay Mactan apan gisuguro sa jail officers ang hugot ang seguridad samtang miabag na ang kagamhanan sa dakbayan sa Lapu-Lapu.

Gihulagway nga gawas nga alimuot nang daan ilabi na ang matag selda nga puno sa binilanggo gisamutan ang kainit nga nasinati sa mga binilanggo hinungdan nga nag-iyahay og pamaypay ug ang paggamit og kandila panahon sa kangitngit.

Matod ni Jail Supt. Julius Arro, warden sa maong pasilida, kalit lang nibuto ang tulo ka transformer diin konektado ang supply sa kuryente sa prisohan.

Matod ni Arro nga kinahanglan sila mogasto og P1.5 milyones isip bayad ngadto sa Mactan Electric Company (Meco), P500,000 niini alang sa bayranan sa kuryente sa bulan sa Pebrero.

Dul-an sa P1,000,000 ang balor sa tulo ka transformer ug wa pay labot sa cost of labor, hinungdan nga nagpatabang ang City jail ngadto sa kagamhanan sa dakbayan sa Lapu-Lapu.

Si Mayor Paz Radaza, sa iyang bahin, misaad nga abagahon nila ang galastuhan, sukad kaniadto ang siyudad na ang nagbayad sa kuryente sa prisohan.

Gani gigahinan na og pundo gikan sa general funds sa syudad og P20.7 milyones alang sa tibuok tuig nga gasto sa jail ug lakip na niini ang pagkaon sa mga piniriso.

Gitug-an ni Radaza nga mismo siya ang nangunay sa pagtawag sa Meco aron mapadali ang pagpalihok ug mabalik ang ilang linya sa kuryente.

Sa niaging semana, giinspekyon sa City Engineering Office ang bilanggoan aron pagsusi sa electrical wiring nga kabahin sab sa technical requirement sa Meco aron mabalik sa supply sa kuryente.

Samtang aron masiguro ang seguridad ug aron mabantayan nga walay mo-eskapo sa mga piniriso nihangyo ang warden sa silingan nga kompanya nga makigamit og kuryente.

Ang tapad nga Trigger Company ang temporaryong mipa-connect sa mga offices diha sa jail.

Ang maong kompanya kasagaran mohatag na usab og orporate social responsibility (CSR) pinaagi sa paghatag og training kalabot sa livelihood program ngadto sa mga piniriso.

Kasamtangan gipasug-an ang perimeter fence sa pasilidad ug aron padayon ang operasyon sa CCTV camera nga gilibot sa area.

Giangkon usab ni Arro nga mas nidaghan na ang mga nagkasakit nga piniriso tungod sa kainit ug gani gitugutan nila ang ubang piniriso nga diha sa hawanan sa City jail magpahangin, adunay uban sa basket ball court matulog atol kagabhion.

Maayo nalang wa sila maproblema sa supply sa tubig bisan kon wala’yagas sa ilang gripo apan nakatabang ang tabay sa maong jail.

“Pinaka-SOP namin dito para maibsan ang problema sa init, pinaka-una yung availability ng tubig, ang tubig kasi pinaka-importante, though apektado then tubig namin, pero we are lucky enough that we have abundant supply of water, kasi itong City jail natin, meron kami kinukuhanan dito na balon dito, natural souce of water, inside sa City jail, so even wala ang electricity, mano-mano naming iniigib, so kahit papano hindi kami nagkaka-problema ng tubig,” gitug-an ni Arro sa Superbalita Cebu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph