PERSONAL nga nahidangat sa probinsya sa Misamis Oriental ang mga Canadian national aron itunol sa probinsya ang 40 foot container van nga napuno sa hospital equipment nga alang sa walo ka tambalanan sa Misamis Oriental Provincial Hospital.
Ang mga hospital equipment mobalor tanan og P292,000 kon diin ang nagikan kini sa Niagara Warehouse of Hope, St. Catherines, Canada.
Miabot kini pinaagi sa local counterpart nila nga Bodega sa Grasya.
Ang maong mga ekipos ilang gihatag isip tabang sa walo ka balay tambalan ug maapod-apod ngadto sa mga kabus sa lalawigan.
Dungan sab sa pagpakayab sa nasudnong bandila sa kapitoyo probinsya niadtong Lunes, Marso 18, nagpakita sab ang mga taga Canada sa ilang talent sa pag-awit.
Si Dick Devries,kinsa founder sa Bodega sa Grasya, mapasalamaton sa kagamhanan tungod kay nagmalampuson ang ilang misyon alang sa mga katawhan nga nagkinahanglan.
Dugang ni Devries nga mapasalamaton siya tungod kay wala sila gipasagdan ni Misamis Oriental Governor Bambi Emano kay gawas sa transportasyon, gipadalhan pa sila ug mga sundalo aron masiguro nga hapsay ug aduna silay seguridad sa kanunay.
Isip sab balos sa ilang gihatag sa probinsya gihatagan sila og plake tungod kay nahimong kabahin sa kalamboan ug kalamposan sa walo ka mga balay tambalanan sa lalawigan.