NAKA-SMILE pa dihang nisaka sa flag pole ang usa ka ulitawo sa wala pa kini naghikot og leston sa sapatos sa iyang liog sa Tumpagon National High School sa Brgy. Tumpagon, siyudad sa Cagayan de Oro niadtong Lunes sa hapon, Marso 18.
Nagtuo ang mga ig-agaw ni Carleo Kenney Joy Mangconsay, 22, residente sa Zone 6, Upper Tumpagon ning siyudad ug tinun-an sa Grade 10 nga nisaka kini sa flag pole aron pagkuha sa flag.
Si Mangconsay usa ka Supreme Student Government (SSG) president sa maong tunghaan.
Gisulayan pa pagluwas si Mangconsay apan naglisud ang mga ig-agaw niini tungod kay morag matumba na usab ang flag pole.
Wala usab nasayod ang pamilya sa problema niini apan nagtuo kini nga duna kini gitago nga problema.
Usa sa mga paryente niini nga nahinabi sa usa ka estasyon sa radyo nibutyag nga ilang gisusi karon ang tinuod nga hinungdan sa maong hitabo.
Una na nga nagpahimangno ang lokal nga kagamhanan sa siyudad ilabi na sa psychosocial division sa City Social Welfare and Development (CSWD) nga mobisita sa ilang buhatan kung ugaling dunay mga nakasinatiang depresiyon o bisan unsa nga mga nasinatiang kaguol o emosiyonal nga problema tungod kay dunay libreng konsultasiyon ang gitanyag ang siyudad.
Matud ni Jaymee Leonen, ulo sa maong opisina, nga angayang modangop sa ilang buhatan o bisan magpadala og mensahe sa ilang Facebook page nga CSWD CdeO psychosocial gumikan kay swerte ang siyudad tungod kay mao lamang kini ang nagtanyag og libreng konsultasiyon aron nga matabangan ang mga nakasinati og depresiyon.
Giingong angayan matud usab nga kamustahon sa pamilya ang matag-usa aron nga malikayan ang depresiyon.
“Kinahanglan nga magpakita pud ta og mental health professional kung naa tay gibati nga kasakit sa atong kasing-kasing or sa atong pangutok and naa ni siya nga serbisyo diri sa CSWD,” matud ni Leonen.