PADAYON ang kainit sa host San Antonio Spurs ug ilang gipangpukan ang back-to-back defending champion Golden State Warriors, 111-105, aron irehistro ang ilang ikasiyam nga sunodsunod nga kadaugan sa National Basketball Association (NBA) kagahapon.
Ning kadaugan, ang Spurs mingsaka sa ikalimang dapit sa Western Conference bitbit ang 42-29 nga rekord.
Gipangulohan ni DeMar DeRozan ang Spurs pinaagi sa iyang 26 puntos ug siyam ka rebounds samtang nidugang og 23 puntos ug 13 rebounds si LaMarcus Aldridge.
“We’re just trying to get wins, man, that’s all,” matod sa usa sa mga sinaligan sa Spurs forward nga si Rudy Gay.
“We’ve had wins, we’ve had big wins, we’ve had some bad losses, (too). It just feels good to win the games we think we should.”
Ang Warriors, nga natagak sa liderato sa Western Conference ug mingdakin-as sa ikaduhang dapit dala ang 47-22 nga rekord, gipangulohan ni Stephen Curry pinaagi sa iyang 25 puntos samtang nitampo og 24 puntos si Kevin Durant. Ang Warriors igo na lang sa pagsaludo sa gipakitang duwa sa Spurs.
“That’s the hottest team in the league and obviously really well-coached,” asoy ni Warriors coach Steve Kerr. “They were executing and I thought they outexecuted us, outcoached us. They deserved to win.”
Dili bastabasta ang gipakita sa Spurs ning pagmugna nila sa labing taas nilang sunodsunod nga kadaugan gikan niadtong 2016 gumikan kay lakip sa ilang gipangbuntog mao ang playoff squads nga mao ang Warriors, Denver Nuggets, Milwaukee Bucks, Oklahoma City Thunder, Portland TrailBlazers ug Detroit Pistons.
“Guys are playing better,” asoy ni Aldridge. “We’re trying to be better defensively. Communication has been better and it’s just winning time. I think everyone senses that.”
Ang Warriors ningduwa nga wala ang duha sa ilang mga pambato nga sila si DeMarcus Cousins ug Andre Iguodala apan nakahatag gihapon sila og saktong kombati gikan sa sinugdanan hangtod sa katapusan.
Gikan sa sikit nga kombati sa 1st quarter, ang Spurs ning pabulhot sa ilang opensa aron pagposte og 14 puntos nga labaw, 52-38, sa hinapos nga bahin sa 2nd quarter.
Dala ang kasingkasing sa kampiyon, ang Warriors ningkamang hangtod nga nakasikit sila pagbalik, 72-70, sa hinapos nga bahin sa 3rd quarter.
Hinuon sa sayong bahin sa 4th quarter, nainat pagbalik sa Spurs ang ilang labaw, 90-82, ug wala na sila molingi pagbalik human niini. (AP, ESL)