HUGOT ang pagtuo ni Top Rank boss Bob Arum nga angayang likayan ni World Boxing Association (WBA) welterweight champion Filipino Manny Pacquiao si International Boxing Federation (IBF) welterweight king American Errol Spence.
Mao kini ang reaksyon sa kanhi promoter ni Pacquiao human mialisngaw ang posibileng panagharong sa Pambansang Kamao ng Pilipinas ug ni Spence sa ugma damlag.
Nagtan-aw sa ringside si Pacquiao sa dihang gikulata’g insakto ni Spence si Mexican Garcia aron depensaan ang iyang korona niadtong Dominggo sa Texas, USA.
Pagkahuman sa away, gihagit ni Spence si Pacquiao nga makig-away kaniya ug gidawat sab kini sa bugtong 8-division world champion sa kalibutan.
Si Arum, kinsa kanhi nagdumala ni Pacquiao sulod sa usa ka dekada, mitambang sa Pinoy boxing legend nga imbes si Spence, mas maayong makigkontra kini ni World Boxing Council (WBC) welterweight champion Shawn Porter, Danny Garcia, Keith Thurman ug uban pa.
Alang kang Arum nga tungod sa pangidaron ni Pacquiao nga 40, delikado kini kon makigsangka ni Spence o ni World Boxing Organization (WBO) welterweight champion Terrence Crawford.
“Manny doesn’t really want to fight Crawford. And the question is - should he? It’s not like he’s a spring chicken, he’s a guy in his 40s and that means something,” pasabot ni Arum sa interbyu sa www.boxingscene.com.
“A guy in his 40s can run the risk of injury, where a guy in his 30s wouldn’t run that risk."
Sa laing interbyu, gipasabot ni Pacquiao nga wala siya nangangha sa iyang abilidad ni Spence.
“He doesn’t really hit that hard,” matod ni Pacquiao sa interbyu sa Tempo.
Si Garcia, kinsa misaka og duha ka weight divisions aron ikaharong si Spence, nakadawat og grabeng kastigo apan wala kini natumba hangtod nahuman ang away.
Matod ni Pacquiao nga wala siya’y likayan nga boksidor apan kinahanglan pa siyang makigsabot sa iyang impuwensiyadong adviser nga si Al Haymon sa Premier Boxing Champions. (ESL)