DEAR Atty Joan,
Ako si Rianne. Lima ka tuig na ming minyo sa akong bana, apan, hangtod karon, wala gihapon mi nagkaanak.
Ang igsuon sa akong bana, nga dise-otso anyos pa, kay nabuntis apan di niya makaya atubangon ang responsibilidad sa pagpadako og bata.
Mao nga nagkasabot mi nga inig parehistro sa birth certificate sa bata kay among ibutang nga ako ang inahan. ron kuno ako ang makonsiderar nga legal nga inahan sa bata ug kami sa akong bana ang moalima sa iyaha.
Unsa ang imong ikasulti ani, Atty? Sakto ra ba ning amo buhaton? Salamat.
Rianne
Dear Rianne
Salamat sa pagpadala ug pangutana. Kana inyong plano kay kalapasan kana sa balaod.
Sulod sa Revised Penal Code, mao na ang giingon nato nga simulation of birth ug kini usa ka iligal nga binuhatan nga mamahimong muresulta sa inyong pagka-priso ug pagbayad ug multa. Base sa imong gisaysay, ang simulation of birth mabuhat kung narehistro sa Registry of Births (record of birth / birth certificate) sa bata nga ikaw iyang inahan bisan pa ug dili kani tinuod ug kini niresulta sa pagkawala sa kaliwatan sa maong bata ug sa tinuod niyang inahan.
Timan-i sad nga ubos sa Expanded Anti-Trafficking in Persons Act (RA 10364), pwede sad kini makonsiderar isip usa ka matang sa attempted trafficking nga muresulta pud sa pagkapriso ug pagbayad ug multa nga gitakda sa balaod.
Hinaot kani kay nakatabang sa imoha.
Atty. Joan
Pahibalo: Kini opinion lamang nga nag-base sa inyong lakbit-saysay ug kini pwede nga mausab kun dugang pa nga mapatin-awanang mga detalye. Kon adunay pa kamoy mga pangutana nga adunay kalabutan sa katungod sa mga bata, mahimo kamong mu-message sa among Facebook account Children’s Legal Bureau, Inc.