TUGNAW pay manikop ang pagbuno og tawo karon. Nagpangidlap nga pananglitan ang patay sa among lungsod nga naa ra kutob sa imbestigasyon.
Upat ka mga konsehal ug usa ka barangay kapitan ang gipangpatay sa San Fernando diin ang imbestigasyon way resulta. Sa kang Reluya duna pay P3.5 milyon nga ganti sa makatudlo sa utok.
Sa mga tuig nga wa pa si Pamuno Duterte ug ang drug war, lima ang gipamatay sa among barangay nga way kaso kay wa sakpi ang mamumuno.
Salamat na lang kay ang usa nasikop kay namista sa among barangay. May nakatitik gitaho gilayon sa kapulisan. Nabilanggo human sa lima ka tuig nga pagtago-tago.
Epektibo ang kapulisan sa amo sa paghuwat lamang. Hinuon nakabawi sila sa drug war. Nikunhod ang drug addiction. Sa among kasilanganan mingaw pa sa tirana.
Kaniadto nagpista ang mga durugista. Giliyukan mi sa drug trade. Nangawa ang mga pusher daw namalhin. Nangaguba ang mga drug den. Ninghunong sila sa bisyo.
Nagmagahion karon ang mga kriminal. Nagsige lag pamatay kay nagsalig. Daghan man gud ang gipamatay nga way kaso kay way klarong suspek nga madakpan.
Kining pagpatay gamit og hitmen lisod masulbad. Gidudahan nga ang kapulisan dunay mga hitmen ug ang mga druglord. Sa San Fernando kinsa? Hanging lang ta kay way suspek.
Sa linuog nga pagpatay sa usa ka tinun-an nga 16 anyos gitutokan karon sa kapulisan sa mando sa itaas. Kay gitutokan duol ang posibilidad nga masulbad.
Hinaot nga kahatagag hustisya ang paglugos-patay kang Christine Lee Silawan. Di man ni drug-related nga pagpatay. Dali ra ni masulbad.
Pahalipay sa Bathalad-Sugbo nga makadawat og Pedro Bucaneg national award gikan sa Unyon ng mga Manunulat sa Pilipinas (UMPIL). Giila ang among paningkamot, singot ug dugo. Mabuhi, ang Sugbuanong Literatura!