KINSAY nag-ingon nga dili maayo ang social media tungod sa sayon nga pagpakatap sa fake news ug bastos nga materyal? May kamatuoran, apan dako kini og matabang kon gamiton sa tinarong nga katuyoan, sama sa pagkatultol sa suspek sa linuog nga pagpatay ni Christine Lee Silawan, 16, kansang lawas nakaplagan buntag niadtong Marso 11 sa Barangay Pajac, siyudad sa Lapu-Lapu.
Ang mga sakop sa National Bureau of Investigation (NBI) 7 maoy nag-unang ahensiya nga nakasubay sa suspek nga kanhi uyab sa biktima pinaagi sa makuti nga imbestigasyon. Ug nakatabang og dako sa imbestigador - ang Facebook account ni Christine ug ang panagbayloay nila og mensahe sa Messenger.
Makatuaw kita sa pag-ingon, “Salamat Facebook.”
Nasayod kita nga ang nahitabo sa maanyag nga dalagita nakahatag og dakong kabalaka sa publiko. May nigawas pa nga angulo sa kulto. Kinsay dili mahadlok labina sa taga Lapu-Lapu kon wala pa masakpi pinaagi sa Facbook ang suspek nga menor de edad lang usab.
Si NBI Regional Director Tomas Enrile niingon nga human mapalgi ang lawas ni Silawan sa usa ka hawan nga dapit, ang NBI nilusad dayon og parallel investigation uban ang kapulisan sa siyudad.
Lakip sa niabag sa imbestigasyon ang NBI Cybercrime Division nga nagbase sa Metro Manila sanglit sila nagtuo nga aduna silay makuha nga ebidensya pinaagi sa Facebook account ni Christine.
Wala sila msayop. Dinhi na nailhan ang ilang person of interest tungod sa paghiling sa account ni Christine, diin ang suspek kanunay i-tag sa dalaga sa mga Facebook post.
Ang social media flatforms o internet sa kinatibuk-an walay kalabotan sa mga negatibong akusasyon apan, ang mga tawo nga naa sa luyo niini. Congrats NBI 7. Salamat, Facebook!