Nabalaka sa seguridad

VILLABA, Leyte- Human siya nganli ni Presidente Rodrigo Duterte isip usa sa mga narco-politician sa Visayas, si Leyte 3rd District Representative Vicente “Ching” Veloso nabalaka sa sa iyang seguridad.

“Well, kinsa bay di mabalaka niana? But, ako I’m 74 and I’ve been an activist lawyer,” matod ni Veloso sa Superbalita Cebu.

Matod niya nga emosyonal kaayo iyang pamilya pagkahibawo sa balita ug hilabihang hilak.

“Don’t worry, this is only a storm. Molabay ra ni. I will continue to run and run and run until we all win,” pasalig ni Veloso.

Gihulagway ni Veloso nga politically motivated ang pagkalakip niya sa narco-list.

Matod ni Veloso, gigamit lang ang Presidente ug klaro nga malisyuso ang pagkalakip kaniya.

ESPINOSA DRUG GROUP

Niadtong Oktubre 2016, si kanhi Albuera Leyte mayor Rolando Espinosa Sr., amahan ni Kerwin Espinosa, mipagawas og affidavit nga naghisgot sa mga opisyal sa gobyerno ug pulis nga gipasanginlan nga protektor sa iyang anak.

Lakip sa listahan si Veloso ug ubang dagkong opisyal sa gobyerno.

Apan sa Senate hearing, gipangutana ni Senador Panfilo Lacson si Kerwin kon apil ba si Veloso, apan matod ni Kerwin, di sila kaila ug wa silay transaksyon ni Veloso.

Mihimakak usab si Veloso ug gitumbok nga pamulitika ug way igong basehan ang alegasyon.

“The President has been used by scrupulous people who are guilty themselves, who I even think as the real protectors of drug lords,” matod ni Veloso.

IMBESTIGASYON

Sa maong kontrobersiya, magtigom ang mga miyembro sa oversight committee sa dangerous drugs sa kamara aron tukion ang isyu.

“When they hit me, they hit the House of Representatives,” matod ni Veloso.

Sa maong meeting, susihon ni Veloso ang mga rason kon nganong naapil siya sa listahan ug kinsa ang nagpaluyo niini.

Kon iyang mahibaw-an, mokiha siya gumikan sa pagguba sa iyang dignidad ug pangalan.

Nakahibawo na usab si Veloso nga gipasakaan na usab siya og reklamo sa Ombudsman sa pagkalakip niya sa narco-list.

“Tan-awon nako kinsa ang complainant. Kinsa ang witnesess ug giunsa nga nabutang man ko (narco-list),” dugang ni Veloso.

MONAOG SA PWESTO

Gihagit ni Veloso ang Philippine National Police (PNP) ug Philippine Drug Enforcement Agency (PDEA) nga mokanaog siya sa pwesto kon mapamatud-an nga usa siya ka narco-politician.

Apan kon di mapamatud-an ang alegasyon, niingon si Veloso nga ang hepe sa nasudnong kapulisan nga si Police Director General Oscar Albayalde ug PDEA National Director Aaron Aquino ang dapat mo resign.

“I already challenged them. If you can prove that I am a narco-politician, I will resign. But on the other hand, if you have no proof, I dare you to resign kay usik usik lang ang sweldo namo sa inyo,” hagit ni Veloso.

Kampante si Veloso nga di kini makaapekto sa iyang subling pagpapili isip konresista.

ANTI DRUG ADVOCATE

Sa pakighinabi sa Superbalita Cebu kang Veloso, iyang gisugilon nga suportado niya ang anti illegal drug campaign sa Presidente.

Matod ni Veloso nga mi donar pa siya og kahimanan sa PDEA 8 aron magamit sa operasyon.

Dugang ni Veloso nga mismo pa si PDEA-Eastern Visayas Director Edgar Jubay ang niingon kaniya nga wa siya sa listahan isip narco- politician.

“Niingon pa si Director Jubay, you have been our partner sa PDEA Region 8 in our anti drug campaign,” matod ni Veloso.

Atol sa iyang pagpanumpa sa Villaba, Leyte niadtong 2016, gibutyag usab ni Veloso sa publiko ang pipila ka mga ngan sa dagkong drug personalities sa lungsod ug giawhag nga mo-surrender.