POSIBLE nga malibkas na ang outbreak sa tipdas sa Cental Visayas (CV) sa dili pa mahuman ang buwan sa Marso o sayo sa buwan sa Abril karon nga nakita sa Department of Health (DOH) 7 nga adunay maayong epekto kining padayon nila nga pagbakuna batok sa tipdas.
Samtang, laing bata ang nakalas gumikan sa maong makamatay nga sakit diin nahimo na nga 10 ang patay sa Sugbo niining tipdas.
Matod ni local health support division chief Dr. Jonathan Neil Erasmo, nga tungod sa sunod-sunod nga kampanya kabahin sa tipdas ug sa padayon nila nga pagpamakuna, anaa nalang sa 1.1% ang pagsaka sa kaso itandi sa nakalabay nga semana nga anaa sa 5%.
Sa labing uwahi nga datus sa Regional Epidemiology and Surveillance Unit (RESU) 7 niabot na sa 1,058 ka mga tawo ang nagka-tipdas karong tuiga.
Mas taas gihapon ni og 1,026% sa susamang petsa niadtong 2018, diin 94 ra ka kaso.
Labing uwahing patay ang 5-buwan nga batang lalake nga taga dakbayan sa Sugbo.
Nagpabilin nga nag-una ang lalawigan sa Sugbo nga aduna’y daghang kaso sa tipdas rong tuiga diin anaa kini sa 731 ka mga kaso.
Huwaton pa sa DOH 7 ang kompirmasyon sa ulohang buhatan niini bag-o sila makalibkas sa oubreak sa tipdas.
Sumala sa unang mga taho nga usa sa gibasol sa pagkataap sa tipdas mao ang wala pagsumiter sa ilang mga anak sa pagpabakona mugna sa kahadolk sa miaging pagtumaw sa isyu sa Dengvaxia vaccine batok sa dengue diin gibasol nga hinungdan sa kamatayon sa pipila ka mga bata nga nahatagan niini. (HBL)