NISAKA na sa 54 ka mga lugar sa Central Visayas ang gipaubos sa election watchlist areas sa Police Regional Office (PRO) 7.
Lakip niini ang 20 sa Cebu, 24 sa Bohol, ug 10 sa Negros Oriental.
Tanang mga dapit sa Negros Oriental anaa sa Red Category diin mao kini ang prayoridad sa kapulisan tungod sa presensya sa New People’s army (NPA).
Matod ni Chief Insp. Dominick Poblete, hepe sa Regional Tactical Operations Office sa PRO 7 nga kining pipila sa 54 ka dapit sa Central Visayas dili pa nila mabutyag ang lista niini tungod kay dili pa kini ang final nga lista.
Apan ang 10 sa Negros Oriental ginganlan na kini tungod kay anaa kini sa red category diin mao kini ang gitutokan sa kapulisan tungod sa hulga subay sa piniliay.
Lakip sa 10 ang lungsod sa Bindoy, Siaton, La Libertad, San Jose, Guihulngan City, Canlaon City, Ayungon, Mabinay, Manjuyod, ug Sta. Catalina.
Dugang ni Poblete nga aduna’y inter-unit operation ang gipatuman sa maong mga dapit.
Samtang usa ang insidente sa San Fernando kabahin sa ambushi ni Mayor Lakambini Reluya nga election-related nga insidente sa Central Visayas.
Sa pagkakaron upat na ka mga election related nga insidente ang natala sa PNP nga kompirmado.
Samtang magsugod og pagpanangtang ang Commission on Election (Comelec) 7 sa mga ilegal nga campaign posters sa mga kandidato atol sa pagsugod sa lokal nga election campaign sugod karong Marso 29.
Matod ni Atty. Veronico Petalcorin, assistant regional director sa Comelec 7 nga laksion nila kining mga ilegal nga gidak-on sa tarpaulin o posters nga gipamutang sa dili designated area.
Usa sa ilahang sutaon kining mga tarpaulin nga gipamutang sa mga traffic signages nga nagkadaghan sa dakbayan sa Sugbo.
Sumatotal, adunay 2,914 ka voting centers ang Central Visayas diin tag duha ka mga pulis ang ipakatap sa PNP atol sa adlaw sa piniliay.
Ang mid-term elections gikatakda karong Mayo 13 sa tytibuok nasod. (HBL)