DALAGA nga nagshower gikuhaan og video sa iyang silingan pinaagi sa paglili sa lungag diha sa pansayan.
Nahitabo ang pagpamuso niadtong Lunes, Marso 18 didto sa Poblacion Ward 3, lungsod sa Minglanilla, Sugbo.
Naputol ang kalipay ni Franco Daniel Tolentino, 19, gym instructor human siya nasakpi sa 18 anyos nga biktima (identity gipugngan).
Si SPO3 Dante Valiente sa Minglanilla Police Station nga nahinabi sa Superbalita Cebu nagkanayon nga samtang ang biktima nagshower nakamatikod siya nga adunay camera nga naka focus ngadto kaniya, gawas sa video gikuhaan sab siya og picture.
Wa matiwas ang gihimo ni Tolentino sa dihang nakabantay ang maong babaye apan wa gilayon motug-an ang biktima gumikan sa kahadlok.
Apan sa iyang pagpa-uli gikan sa eskwelahan sa susamang adlaw iyang gipahibawo ang iyang ginikanan hinungdan nga gisikop ang suspetsado ug gi-turnover ngadto sa kapulisan.
Matod pa ni SPO1 Valiente nga ang suspetsado miangkon sa kremin nga iyang nahimo tungod kay natintal lang siya niadtong higayona nga nadala sa kahidlaw samtang nagtan-aw nga naligo ang biktima.
“Naa man daw gamay nga buslot sa Ibabaw gipalusot niya ang cellphone sa pagvideo, pero nakabantay ang biktima sakpan siya,” dugang ni SPO1 Valiente base sa pamahayag sa suspetsado.
Dugang pa ni Tolentino nga dali ra sab niyang gi-delete ang video ug picture nga kuha diha sa banyo apan wa ma-recover ang gadget nga posibleng gitagoan sa suspek.
Kasong unjust vexation ang gipasaka batok ni Tolentino apan dali ra sab nga mipiyansa alang sa iyang temporaryong kagawasan.