MODUAW sa dakbayan sa Sugbo ang Hugpong Ng Pagbabago ni Mayor Sarah Duterte karong Marso 21 aron iindurso ang mga kandidato sa Barug PDP-Laban.
Si Konsehal Raymond Garcia, kinsa maoy nahibawo sa maong kalihukan, niingon nga tambungan sa kapin o kulang 8,000 ka mga tawo ang maong proklamasyon nga himuon sa IEC Pavillon sa Barangay Mabolo.
Matod ni Garcia, nga iisa na usab ang mga kamot nilang Bise Mayor Edgardo Labella, kandidato pagka-mayor ug Mike Rama, runningmate.
Ilakip sa pag-isa ang kandidato sa pagka-kongresista.
Iya kining gihulagway nga makahatag og igo nga kompyansa sa mga tawo nga mosuporta sa ilang grupo sanglit sila ang gisaligan mismo ni Presidente Rodrigo Duterte.
Nianang pagkabuntag, ang HNP ni Duterte nga gipangulohan ni kanhi special assistant to the president Bong Go, Ronald “Bato” Dela Rosa, Imee Marcos ug kaubanan, mohimamat usab sa mga Mandauehanon aron suportahan ang slate ni Mayor Luigi Quisumbing.
Gitug-an ni Garcia nga inig ka hapon, motapon ang grupo sa IEC, kansang programa magsugod alas 2 sa hapon ug mahuman sa dili pa ang tingpanihapon.
Niadtong Pebrero 24, nibisita si Presidente Duterte ug giindurso ang kandidatura nilang Labella ug Rama. (PAC)