SECTIONS
Monday, April 22, 2019
SUPERBALITA CEBU

Tanod nag-cum laude sa engineering

Garbo: Gibitay nga mapasigarbuhon sa mga opisyal sa Barangay Kalubihan ang tarpauline nga nagpahalipay kang Janryl Tan, usa sa ilang mga barangay tanod, nga mograduwar nga cum laude sa civil engineering. (Alan Tangcawan)

WA IGSAPAYAN sa usa ka batan-ong barangay tanod ang iyang kalisod, problema sa pamilya ug mga pagsuway sa pagtungha molampos lang siya sa pagtuon.

Nagbunga og maayo ang paningkamot ni Janryl Judilla Tan, 23, sakop sa barangay public safety officer ( BPSO) kun tanod sa Barangay Kalubihan, Dakbayan sa Sugbo kay mo-graduate siya isip cum laude sa kursong Bachelor of Science in Civil Engineering sa University of Cebu karong Marso 20.

Si Tan, anak nila ni Nilda ug Jerry, kinsa nagkabuwag na.

Siya niabot sa Sugbo niadtong 2014 gikan sa Lourdes, Misamis Oriental.

Ang iyang papa nga si Jerry, kinsa lupon sa Barangay Kalubihan, maoy niindurso kaniya ngadto kang kanhi kapitan Carmelo Milan aron makatrabaho isip tanod.

Gidawat siya ni Milan, mo-duty panahon sa gabii sanglit moeskwela siya sa adlawan.

Bisan kon scholar siya sa Commission on Higher Education (Ched), kuwangon gihapon ang P15,000 grant matag semester sanglit labing minos mobayad siya sa UC og P19,000 hangtod P23,000, wa pay labot sa allowance matag adlaw nga iyang gikinahanglan.

Gihulagway ni Janryl nga dako og gikatabang niya ang pagka BPSO sanglit makadawat siya og P2,500 gikan sa barangay ug P4,000 gikan sa Cebu City Government matag buwan.

TRABAHO

Ang iyang trabaho mao ang pag-roving kuyog sa laing mga tanod matag gabii aron masiguro mga luwas ang Barangay Kalubihan gikan sa dautang mga elemento.

Hangtod nga siya ang gitahasan sa pag-monitor sa CCTV ug paghimo og report.

Matag karon ug unya, sa higayon nga mabakante ang iyang oras, mobukit usab siya sa libro aron pagtuon sanglit inig kaugma, nahibawo siya mga mosulod na sab siya sa eskwelahan.

“Wa gyud niabot sa akong hunahuna ang pag quit. I’m determined to graduate and siguro ang Latin honor bonus na lang na kay gusto ra gyud ko mo graduate gumikan sa kalisod sa kinabuhi,” padayag ni Janryl.

Ang mama ni Janryl nga si Nilda naabot kagahapon gikan sa Mindanao.

Labing una kining gihayon nga sila magkita human sa pipila ka tuig sa iyang pag-anhi sa Sugbo.

MOBIYA PAGKA-TANOD

Human sa graduation, iyang tinguha ang pagtutok ug paggahin og igo nga panahon para sa board examination karong Nobiyembre.

Si Kapitan Rex Milan, all-out support kang Janryl, niingon nga iya kining tabangan para makab-ot ang pangandoy nga maenhinyero.

“Sa ako gikaingon pa, unsay akong matabang personally para sa iyang board exam, all out support ko niya even financially. Hinaot unsa man gani imong maabtan Janryl ayaw kalimti asa ta nagikan bisan unsa kadako sa atong makab-ot. Stay grounded lang gihapon ta.” Padayag ni Milan kinsa proud sa iyang batos.

Si Janryl niingon nga kon makapasar na siya sa board exam, andam gihapon siya moserbisyo sa barangay Kalubihan sa iyang kapasidad bisan kon dili na siya tanod.

COSAP MO-RECOMMEND

Si Garry Lao, pangulo sa City Office for Substance Abuse Prevention (Cosap), niingon nga iyang irekomendar ngadto kang Mayor Tomas Osmeña nga i-hire si Janryl isip sakop sa Mayor’s Management Team sanglit kwalipikado isip cum laude.

Si Lao mapasigarbuhon sanglit iyang gihulagway nga ang nakab-ot ni Janryl talagsaon, hilabi na sa hitsura sa iyang trabaho samtang magtungha.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!