SECTIONS
Wednesday, July 17, 2019
SUPERBALITA CEBU

Flyover sa UN Ave. gipadaplin una sa DPWH

GIPADAPLIN una sa Department of Public Works and Highways (DPWH) sa Central Visayas ang pagpatukod og flyover sa United Nations Avenue ug Plaridel Road, siyudad sa Mandaue isip kabahin sa tri-level project.

Si Engr. Nonato Paylado, pangu sa planning and design division sa DPWH 7, nibutyag nga tungod sa pipila ka mga kalamboan, ilang giprayoridad kon unsa nga mga proyekto ang unang ipatuman, aron sila makapangandam alang sa umaabot nga dagkong mga proyekto.

Atol sa quarter meeting sa Metro Cebu Development and Coordinating Board (MCDCB) niadtong Lunes, Marso 18, sa Kapitolyo, sigon ni Paylado dili na mahimong tri-level ang proyekto tungod kay kinahanglan una nila tun-an og maayo kon mohaom pa ba ang flyover sa dapit sa pag-abot sa dagkong mga proyekto.

Sumala niini dihang giplanohan ang tri-level project, wa pa mahimo ang Metro Cebu Transport Master Plan ug dihang kini nabuhat, ilang nasayran nga apil niini ang Urban Mass Rapid Transit (UMRT).

“Kanang UMRT nga imong nadungog UMRT 1 ug UMRT 2, way seguro usa ana moagi sa Plaridel. So, kon mag-atang to ang flyover mas motaas pa, third level, which will be costly. Pero if wa tay flyover nga nag-atang, medyo lesser ang cost. So, mas mo-prefer mi nga amo na lang nang i-defer anyway the underpass along dako nana og matabang sa traffic congestion,” matod ni Paylado dihang nahinabi sa Superbalita Cebu.

Ang flyover kay usa sa mga component sa tri-level pass project sa UN Avenue ug Plaridel Road, uban sa 602 ka metros nga underpass nga may upat ka lanes ug ang on-grade, ang estruktura kansang level kay susama sa kasamtangang roadway sa lugar.

Siya nipasabot nga dihang gihimo ang feasibility study alang sa Metro Cebu Expressway nga kanhi gitawag nila og Cebu Circumferential Road, naapil na ang ang elevated highway subay sa Ouano Avenue diin di na mohaom ang flyover.

Siya nidugang ang underpass mo-complement sa bisag unsa nga dagkong mga proyekto nga himuon sa dapit.

Sa samang tigom, gipaneguro ni Paylado nga kon unsa man ang kahimtang sa dagan sa trapiko sa lugar sa kasamtangan dili kini mausab sa higayon nga magsugod na sila og trabaho sa carriage way.

“When the service roads are in place, passable na siya. It means the traffic will just simply transfer sa service road, the same number of lanes, two lanes sa pikas, two lanes sa pikas and that’s the time we are going to start the underpass,” pagseguro ni Paylado.

Matod niya padayon karon ang pagtrabaho sa lugar diin gitabunan na og kural ang dapit, gisemento ang service roads, gipamutol ang mga kahoy, gipamalhin ang mga poste ug padayon ang negosasyon sa mga tag-iya sa luna nga maapektuhan sa proyekto.

Nakiglambigit usab sila sa Kagamhanan sa Siyudad sa Mandaue alang sa dugang detour nga makatabang pagpaluag sa trapiko.

Ang underpass unang gisugyot niadtong 2010 ug pagka 2011 sila nakakuha og suporta gikan sa City Development Council sa kagamhanan sa siyudad sa Mandaue ug Regional Development Council (RDC) 7.

Ang DPWH nakakuha og P500 milyones nga pundo gikan sa 2016 General Appropriations Act (GAA) ug dugang P446 milyones gikan sa 2017 GAA alang sa underpass component.

Ang B.M. Marketing nga nagbase sa Leyte ang nakakuha sa P711.8 milyones nga kontrata niadtong Disyembre 8, 2017 alang pagtukod sa underpass.

Sumala ni Paylado nga gipaabot mahuman ang underpass sa Hunyo 4, 2020.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph