SECTIONS
Wednesday, April 24, 2019
SUPERBALITA CEBU

Suspek ‘diha ra sa balay’

KINSA diay kadtong lalakeng nagkawo nga gikakuyog ni Christine Lee Silawan sa wa pa siya patya niadtong gabii sa Marso 10 base sa close circuit television (CCTV) camera?

Kay kon ang mga kaila ug kabanay sa 17 anyos nga lalakeng suspek ang pasultihon, didto ra siya sa ilang balay sa Barangay Maribago, Dakbayan sa Lapu-Lapu sa tibuok adlaw.

Nagduwa siya og basketball hangtod sa alas 7 sa gabii, matod sa silingan ug pamilya.

Sa ilang press briefing niadtong Lunes sa gabii, ang National Bureau of Investigation (NBI), kinsa nipasaka og kasong murder sa suspek, niingon nga si Christine Lee gipatay mga alas 6-7 sa gabii.

Usa sa mga kaila sa akusado nga nahinabi sa Superbalita Cebu, nibutyag nga alas 7 sa gabii niadtong Marso 10, nag-uban sila sa 17 anyos nga nagduwa og basketball sa covered court sa ilang dapit ug pagkahuman nangaon og balot.

Matod ni “Armando” (dili tinuod nga ngalan), di siya mahimong masayop nga nakit-an niya ang 17-anyos nga suspek kay pagkahuman og duwa, dungan silang nangaon og balot.

Pagkahuman nila og pangaon, giingong niuli ra usab ang suspek sa balay niini.

Ang pamahayag sa kaila sa akusado gidasonan usab sa tindero og balot sa covered court.

Matod sa tindero nga si “Gorio” (di tinuod nga ngalan), nga nakaila siya sa akusado sanglit kanunay kini magduwa og basketball sa covered court siya naninda.

Nakaila usab siya sa pagkatawo sa akusado, kinsa di bugoy o maldito pagkabata.

Gani gibutyag ni “Gorio” nga wa siya makakita nga manigarilyo ug nakakita og away.

“Mga alas 7 jud to, Sir. Diri jud siya anang mga orasa positive,” matod ni “Armando.

Ang pamahayag sa duha, nitakdo usab sa estorya sa inahan sa suspek nga si Nina (di tinuod nga ngan), nga ang iyang anak diha ra sa ilang balay human sa pagduwa og basketball.

Matod ni Nina nga sa Dominggo, Marso 10, ang iyang anak nitabang sa pag-ayo sa ilang atop sa balay sa buntag.

Nianang pagkahapon, niduwa kini og basketball ug mga alas 6 sa gabii, niuli kini sa ilang balay aron mokaon ug nitan-aw og TV una nanihapon.

Pagkahuman niini og kaon natulog ang iyang anak.

MUGNA-MUGNA?

Giakusahan sa inahan ang mga awtoridad nga gimao-mao ang mga ebidensya batok sa iyang anak.

Si Nina nipasangil nga hayan nag-apas ang mga awtoridad sa P2 milyones nga reward sa makaila ug makatudlo sa mamumuno ni Silawan.

“Wa lang ni sakyi og award award, dili seguro ingon ana ka force, nga mo pick up na lang mo og inosente nga tawo,” matod ni Nina, nga klarong nagpasabot sa NBI.

Si Nina niingon nga ang giingon nga mga account sa iyang anak gigama-gama lang kay usa ra ang social media account sa iyang anak nga mao ang Cliff Malik.

Nagduda siya nga kunsabo sa mga awtoridad ang mga saksi nga iyang giingon nga wa makaila sa iyang anak.

Si Nina di makatuo nga nailhan ang iyang anak pinaagi sa CCTV nga maoy gipresentar sa NBI nga apil sa ilang mga ebidensya.

“Unsaon pagklaro ana nga nagtalikod man na? Wa man mag-atubang,” matod ni Nina sa exclusive interview sa Superbalita Cebu sa ilang balay sa Maribago.

DUNAY EBIDENSYA

Gipaka gamay lang sa NBI ang pasangil sa inahan sa prime suspect.

Matod ni Dominador Cimafranca, assistant regional director sa NBI 7,magbase lang sila sa mga ebidensya nga naa karon sa kustodiya sa ilang buhatan.

Wa na siya motubag sa pasangil ni Nina nga sa dihang gi-pick up sa NBI ang iyang anak, gidapatan kini aron lang angkunon ang salaod.

Gihulagway ni Cimafranca nga nga lig-on ang ilang mga ebidensya nga mag tumbok sa 17 anyos nga suspek.

Gitakdang moabot sa NBI 7 karong adlawa ang mga forensic team gikan sa ilang national office aron moeksamin sa nakuha nila nga sapot ug kawo sa suspek nga gituohan nga adunay lama sa dugo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!