HINAY-HINAY nang nahukasan sa takuban ang suspek sa pagpatay sa 16-anyos nga dalaga sa usa ka barangay sa Lapu-Lapu City kon diin nakaplagan ang iyang patay nga lawas sa buntag niadtong Marso 11.
Ang biktima nga si Christine Lee Silawan, gawas sa mga samad nga naangkon sa nagkadaiyang bahin sa lawas, gipanitan sab ang nawong ug dunay mga organ nga giingong nawala.
Daghan ang nagtuo nga ang usa ka Jonas Bueno, kinsa nadakpan dinhi sa siyudad sa Davao niadtong Marso 15, mao na ang suspek.
Apan gihimakak kini sa mga awtoridad nga nag-imbestigar sa kaso sa 16-anyos gumikan kay si Bueno mao diay ang gitumbok nga suspek sa pagpatay sa usa ka mag-uuma sa Danao City nga gipanitan sab ang nawong ug dughan.
Apan niadtong Lunes sa buntag, nabaniog nga nadakpan na ang prime suspect sa pagpatay kang Christine nga usa ka menor de edad.
Apan kapulisan duna pay gihimong mga operasyon sa pagtuo nga di lang ang menor maoy naghimo sa krimen, kon di duna siyay kakunsabo sa paghimo niini.
Apan ang inahan sa suspek nagduda nga gitumo-tumo lang ang pasangil ngadto sa iyang anak sa mga awtoridad aron nga makuha ang ganting salapi nga moabot og P2 milyones.
Alang sa inahan nga lisud tuohan ang mga pasangil ngadto sa iyang anak kay di mabuhat sa anak ang pagpatay sa biktima.
Apan base sa gihimong imbestigasyon sa kapulisan, apil na ang National Bureau of Investigation (NBI), ang menor maoy natumbok sa mga footages sa closed circuit television (CCTV) camera nga ilang nahuptan.
Ang suspek matud pa maoy kanhi uyab sa biktimang si Christine. Gani, sumala pa, giangkon sa suspek nga tungod sa selos, nahimo niya ang niluog nga krimen.
Hinuon, wala pa sirad-i sa mga awtoridad ang kaso ug padayon pa ang lawom nga imbestigasyon aron nga matugkad gyud ang mga sirkumstansiya kon nganong niabot sa punto ang pagkutlo sa kinabuhi sa biktima.
Mas maayo kini nga lakang sa mga awtoridad aron way mahikaw nga tawhanong katungod sa suspek ug di sab mahikawan ang pamilya sa biktima nga maangkon ang hustisya.