SA AMONG programa sa radyo, dunay suki nga tigpaminaw nga nangutana namo pinaagi sa text message labot sa atras-abante nga pamahayag sa Palasyo sa Malakanyang. Iyang gitumbok ang pahayag ni Presidential Spokesperson Salvador Panelo sa miaging mga adlaw.
Usa na dinhi ang pahayag ni Panelo labot sa pagpaguwa sa listahan sa mga narco-politicians karong umaabot nga eleksiyon. Gihingusngan niya nga dunay igong mga ebidensiya ang Philippine Drug Enforcement Agency (PDEA) ug uban pang law enforcement units mao nga tinuod gayud nga nalambigit sa illegal drugs ang mga politiko nga naa sa listahan.
Mireak ang kadaghanan dihang giingon sa tigpamaba sa pangulo nga ang pagpaniid gihimo nila uban sa tabang sa langyaw nga tigpaniid nga nag-wire tap sa konbersasyon sa mga nalambigit nga politiko. Tungod niini, dali kaayong nakabawi sa iyang giluwatan nga pahayag ang kalihim.
Niadtong miaging adlaw, giluwatan sab niya nga gitaktak sa puwesto ni Pangulong Rodrigo Duterte si kanhi Philippine Charity Sweepstakes Office general manager Alexande Balutan. Giingon sa tigpamaba nga gitaktak si Balutan tungod kay nalambigit sa kurapsiyon. Apan, walay klarong pahayag kung unsa nga matang sa kurapsiyon ang gikalambigitan sa opisyal. Unsa ba gyud diay ang tinuod?
Di lang kini ang higayon nga nasipyat ang Malakanyang sa ilang pamahayag. Busa, nakaingon ako nga wala silay konkreto nga communication policy, protocol ug maayong plano unsaon paghatag sa hustong impormasyon sa publiko.
Krusyal man god ang ilang trabaho mao nga kinahanglan tun-an ang mga maayong sumbanan sa communication management aron di mapagan ang Pangulo sa mga palpak nga trabaho sa iyang mga sinaligan.
Sa akong nakita, kinahanglan nga tanang impormasyon sa di pa ipagawas ni Panelo, gihisgutan na nila uban sa Pangulo ug mga ahensiya nga dunay kalabutan sa isyu aron matuod nga impormasyon ang mapadangat sa publiko. Kini nga mga komunikasyon gikan sa taas paingon sa ubos nga empleyado.
Sa samang pagkaagi, ang anaa sa ubos nga puwesto mohatag sab og komunikasyon ngadto sa taas nga opisyal aron di masayop ang Pangulo sa mga datos nga gikinahanglan sa iyang pagpamulong. Kay kung masipyat ang atong Pangulo, kaulawan baya natong mga Pilipino.
Sa tunga-tunga sa termino sa atong Pangulo, nanghinaut ako nga di na atras-abante ang mga pahayag sa tigpamaba sa Palasyo.