MALITA, Davao Occidental – Abot 471 ka pamilya ang pugsanong gipabakwit sa lokal nga kagamhanan, apil ang silingang Don Marcelino, sumala sa Provincial Risk Reduction and Management Council (PDRRMC) adlaw’ng Martes, Marso 19.
Si Harry Camoro, PDRRMC action officer, nagbutyag nga ang pre-empted evacuation gihimo alang sa kaluwasan sa mga molupyo nga anaa sa landslide prone ug flood prone areas.
Matud ni Camoro, 199 ka pamilya ang anaa sa evacuation center sa lungsod ug 272 sa Don Marcelino ang anaa sa ilang evacuation center sab.
Apan mahimong madugangan pa ang ihap sa mga bakwit kon dunay giigo sa baha sa ubang dapit sa probinsiya.
Ang Municipal Social Welfare and Development Office daling nanghatag og mga food packs sa mga pamilyang apektado.
Ang tropical depression “Chedeng” ni-landfall kagahapon sa eastern cost sa probinsiya.
Samtang, si Governor Claude Bautista nagpaguwa og memorandum order sa pag-suspende sa klase sa tanang tunghaan sa probinsiya kagahapong adlawa
Giawhag sa gobernador ang publiko nga magbantay sa kaugalingon apil ang mga bata ug ilang propedad nga luwas sa baha.
Kahinumdoman nga sukad Lunes sa gabii, wa nay puas ang uwan sa probinsiya.
Ang bagyo nga nahimo nang low pressure area (LPA) kagahapon sa buntag padayon nga magdala og uwan sa dakong bahin sa Mindanao, sumala sa Philippine Atmospheric, Geophysical and Astronomical Services Administration (Pagasa).
Dugang sa state weather bureau nga ang Mindanao nakadawat og “way below normal” kun 60 porsiyento nga way uwan sud sa duha ka bulan tungod sa hinay nga El Niño. (Orlando B. Dinoy)