COTABATO CITY -- Gitimbaya sa tigpamaba sa Moro National Liberation Front (MNLF) Misuari Faction ang Moro Islamic Liberation Front (MILF) sa kalampusan sa pagkamugna sa Bangsamoro Autonomous Region in Muslim Mindanao (BARMM).
Gihimo ang pagtimbaya sa tigpamaba sa MNLF Misuari Faction nga si Atty. Emmanuel Fontanilla dungan sa selebrasyon sa Bangsamoro Freedom Day ug 51st Founding Anniversary sa pagkamugna MNLF nga nakigbatok sa kanhi administrasyon ni Presidente Ferdinand Marcos.
Nalipay ang MNLF sa nagmalampuson nga panghinabing pangkalinaw tali sa gobyerno ug MILF nga niresulta sa pagkaratipika sa Bangsamoro Organic Law (BOL).
Apan alang sa MNLF, ila gihapong gipursige ang federal form nga kagamhanan nga suportado sa ilang lider nga si Prof. Nur Misuari.
Wala sab makatambong si Misuari sa panagtipon sa libuan ka miyembro sa MNLF sa People’s Palace sa Cotabato City apan nagpaabot siya og pagtimbaya pinaagi sa live sa social media.
Hinuon nahiabot ang asawa ug anak ni Misuari nga nagtimbaya sa tibuok puwersa sa MNLF atol sa MNLF Grand Summit sa siyudad sa Cotabato.
Nagpasalamat si Mayor Cynthia Guiani Sayadi sa malinawon nga selebrasyon sa anibersaryo sa MNLF ug sa tanan nga sektor nga mitabang sa aktibidad. (Edgar E. Fuerzas)