HINAYHINAY nang namalik sa ilang panimalay ang mokabat 4,103 ka mga tawo kinsa namakwit sa pagtugpa sa Bagyong Chedeng sa Davao Region.
Ang Office of Civil Defense (OCD)-Davao, nakatala og 4,103 ka mga internally displaced person (IDP), ug gitaho nga walay bisan usa nga namatay nga indibiduwal sa maong daut sa panahon.
Bisan sa pagtugpa sa Chedeng sa rehiyon, nagpabiling normal ang komersyon sa Davao City ug sa pipila ka dapit ning rehiyon apan walay klase sa mga estudyante.
Sa pakighinabi kang Ret. Supt. Alfredo Baloran, ang hepe sa City Disaster Risk Reduction and Management Council, nga subay sa ilang monitoring walay namatikdan nga mga pagdako sa tubig sa mga sapa sa siyudad ug walay nahitabo nga mga pagbaha.
Apan gilauman nga karong adlawa posibleng motaas ang tubig sa kasapaan sa Davao gumikan sa natigum nga tubig ulan gikan sa bukid.
Hinoun dunay lima ka pamilya sa Quinones Compound, Barangay Matina Crossing ang pugos nga gipapahawa sa ilang lugar human makita nga miliki na ang bukid nga dunay posibilidad nga mo-landslide.
“Naa sila karon sa barangay hall sa Crossing Matina, ginaatiman sa atong mga barangay officials,” ingon ni Baloran.
Giingon nga pag-ulan lang ang gikiay ni Chedeng ug dili kaayo hangin sa pagtugdon niini sa yuta alas 2:30 sa kaadlawon, Martes.
Suma sa weather bureau sa Philippine Atmospheric, Geophysical and Astronomical Services Administration (Pagasa), lauman nga Huwebes, Marso 21, makasinati og init nga kahimtang sa panahon ang tibuok rehiyon.
Sa pikas bahin, si Davao Oriental Governor Nelson Dayanghirang nag-order na sa tanang ahensya sa DavOr nga paspasan ang pag-ayo sa Masipit Bridge sa Tarragona town nga nadaut sa Chedeng.
“Governor Dayanghirang, who was joined by Vice Governor Niño Uy, ordered the Provincial Engineer’s Office to work and coordinate with the Department of Public Works and Highways (DPWH) District Office and Municipal Engineer’s Office to fast track the repair as they inspected the site earlier today,” ang statement sa ilang official Facebook page. (Richy F. Nalagon)