MAG-agaw nga sakop sa usa ka dakong drug group nga naglihok sa siyudad sa Sugbo ang nasikop sa mga sakop sa Drug Enforcement Group (DEG) 7 inabagan sa Abellana police station 2 atol sa buy-bust sa alas 10:11 sa milabayng gabii, Marso 19, sa Acacia St., Barangay Capitol Site.
Ang mga dinakpan giila nga silang Mark Ababa Mier ug Virgo Pacubas Mier nga molupyo usab sa naasoy nga dapit diin nakuhaan kinig walo ka dagkong pakete sa gituohang shabu nga motimbang sa 600 gramos nga mobalor kini og P4,080,000.
Sa gihimong imbestigasyon, nasuta nga sakop sa big time drug group ang duha gipadagan ni Mark Abellana nga naa sa sulod sa Cebu City Jail.
Matod ni Supt. Glenn Mayam, hepe sa DEG 7, nga dugay na nila nga gi-monitor ang mag-agaw human milutaw ang angalan niini sa ubang kaso.
Wala malakip sa ilang watch list ang duha sanglit giila kini nga mga new player sa druga.
Sa dihang nakakuha sila og kontak sa mga suspek ila dayon nga gilusad ang buy-bust uban ang Abellana police station nga miresulta sa pagkasikop sa duha.
Giangkon ni Mark Mier nga iyang bayaw si Mark Abellana maoy lider sa drug group sa Sugbo.
Si Abella , matod pa, manawag kung kinsa ang hatagan sa supply sa illegal nga drugas gikan sa usa ka wala pa nganli sa kapulisan nga tinubdan.
Hangtod karon, padayon sa ilang ilegal nga negosyo ang mga durugista nga naa sa sulod sa bilangoan tungod kay aduna pa silay cellular phone nga magamit sa sulod.
“Naa tay nakuha nga information niya nga subject pa sa atong follow-up operation,” matod ni Mayam.
Tungod sa maong impormasyon nga nakuha sa kapulisan, mohimo pa sila og dugang operasyon batok sa ubang mga sakop sa sindikato. (AYB)