USA ka 31-anyos nga snatcher ang nasikop sa Abellana Police Station human niya labnihi ang usa ka 25-anyos nga babaye atbang sa Kapitolyo, dalan sa Escario, Barangay Capitol site, Dakbayan sa Sugbo udto sa Martes, Marso 19.
Ang nadakpan human makalabni og ariyos mao si Arman Mabini Cantila, taga Sitio Sambag 4, Barangay Guadalupe diin ang iyang gibiktima mao si Diana Escalante, taga Sitio Opra, Barangay Kalunasan, dakbayan sa Sugbo.
Si Escalante nagsakay sa usa ka jeep apan pag-abot sa atubangan sa usa ka bangko atbang sa Capitol, samtang huot ang dagan sa trapiko, kalit naabot ang suspek ug gilabni ang iyang ariyos sakay sa iyang XRM nga motor. ST 8708 ang plate number sa iyang motor.
Dali nga nakanaog ang biktima ug nagunitan ang motor dayong nangayo og pakitabang sa mga pulis nga naa ra usab nag-beat patrol sa sibyanan sa DYHP.
Nagtingkagol na karon sa selda sa Abellana Police Station si Cantila ug miawhag ang kapulisan nga kon kinsa kadtong nabiktima sa suspek sa pagpanglabni, modangop sa ilang istasyon alang sa dugang kaso nga ilang ipasaka sa suspek.