UNOM ka mga tinun-an sa usa ka unibersidad sa dakbayan sa Mandaue ang nasikop human giingon nasakpan nga naghithit ug nakuhaan ug linikit nga marijuana sa likud sa maong tunghaan sa Barangay Looc.
Duha sa mga nadakpan nga tinun-an puros graduating sa ilang kurso.
Sa unom nga nadakpan, usa ang nailhan nga menor de edad.
Matud ni Police Captain Reyco Romaguera, ang deputy chief sa Opao Police station, nga alas 12:40 Martes sa udto, Marso 19, nakadawat sila og tawag gikan usa ka nagpaila nga concerned citizen kalabot sa giingon nga lantaran nga naghithit og marijuana sa grupo sa mga tinun-an sa usa ka unibersidad, nga naka-uniform pa.
Hinungdan nga dali nga niresponde ang kapulisan ug nasakpan si Kevin Dayto, 21 anyos,taga dakbayan sa Sugbo ug tinun-an sa maong unibersidad.
Naaktuhan si Dayto sa mga pulis nga naghithit sa marijuana.
Samtang ang laing lima ang giingon nga suway unta nga moeskapo, nakuhaan og tagsa ka marijuana stick.
Nasikop kuyog ni Dayto sila Erick John Recto Pardilla, 22 anyos, taga Mabolo, siyudad sa Sugbo; Gunther Arche, 20 anyos, taga Dapitan sa lungsod sa Cordova; Ervin Estiola, 20 anyos, taga Ibo sa siyudad sa Lapu-Lapu; ug is Ivan Sheen Intong, 20 anyos, taga Marigondon, siyudad sa Lapu-Lapu.
Apil sad ug kasikop ang usa ka 17 anyos nga estudyante nga taga Canjulao, siyudad sa Lapu-Lapu.
Apan gihimakak sa lima nga nangapriso sa Opao Police Station ang pasangil sa kapulisan.
Matud nila nga igo ra sila nagpaabot sa oras alang sa pagsulod og balik sa ilang tagsa ka mga klase.
Gani nagkanta-kanta lang sila sa dihang natingala nalang nga adunay mga pulis nga niabot, ug giingong diritso na sila gisikop.
Pangangkon usab ni Dayto nga nanigarilyo lang siya, ug dili marijuana ang gihithit.
“Wala gyud mi makuhai og marijuana, magtambayan naman gyud mi diha, gawas sa tindahan na nya duol pa gyud sa school. Ngano gud maghithit mi diha,” rason sa usa sa mga dinakpan.
Apan duha sa mga dinakpan ang niangkon nga nakagamit og marijuana, duha na ka bulan ang milabay, atol sa usa ka okasyon.
Mga kasong kalapasan sa Section 11 ug 12 sa Republic Act 9165 ang ipasaka batok sa lima.
Si Dayto ug ang upat niya ka kauban kay natanggong karun sa Opao Police Station samtang ang ilang kauban nga menor de edad kay anaa karun sa kustodiya sa Mandaue City Social Welfare Services.
Samtang awhag ni Mandaue City Police Office (MCPO) director Senior Supt. Julian Entoma nga ang maong grupo sa mga nasikop nga tinun-an ang pipila na kahigayon nga nakit-an sa concerned citizen, diin diha ra sa hawanan, o gawas sa tindahan maghithitay sa pinauga nga marijuana ug dili lang katong higayuna.
Hangyo ni Entoma usab sa mga dinakpan nga mas maayo nga motug-an kon kinsa nila gipamalit ang marijuana.
Awhag usab sa director sa mga tunghaan nga motabang sa pagpakgang nga aduna pay mga tinun-an nga mabiktima sa maong mga ilegal nga drugas, sama nalang pagpahimutang og CCTV camera sa palibot sa tunghaan, aron magpanuko nga mogamit diha doul sa tunghaan.