NAKAMUGNA og traffic ingon man kahadlok sa mga motorista ang tulo ka mga poste nga nitakilid sa dan P. Del Rosario sa Miyerkules sa udto, Marso 20, human masangit sa usa ka truck ang wire niini ug nabitad.
Ang miharag mao ang duha ka mga poste nga iya sa Visayan Electric Company (Veco) samtang ang usa iya sa telecommunications company.
Alas 12:22 sa udto dihang gipawong sa Veco ang kuryente nga nakaapekto sa mga konsumidor sa P. del Rosario ug Barangay Day-as.
Matod sa tigpamaba sa Veco, Quennie Bronce, nga mga concrete nga poste ang nitakilid.
“Naa nay emergency crew sa area. Naa sad lain team nga nagkuha na sa mga replacement poles diri sa Banilad,” si Bronce nagkanayon dihang gikuhaan sa iyang habig kagahapon.
Tungod usab sa risgo nga matumba kini, hinungdan nga gi-reroute una ang sakyanan nga moagi sa maong parte sa dalan. Daling nipadala og emergency crew ang Veco ug kasamtangan nga giilisan pa ang mga poste.
Sa pagsuwat ning taho, wa pa matino kon kinsa ang driver sa truck tungod kay nibiya dayon kini sa maong dapit.
“Pabayaron ang tag-iya sa truck for the cost of materials and labor,” pasabot ni Bronce sa Superbalita Cebu. Magbase ang Veco sa report sa Cebu City Transportation Office (CCTO) sa pagkuha sa impormasyon kabahin sa sad-an sa hitabo.
Gipasabot ni Bronce nga molanat og walo ka oras human sa pag-ugbok sa bag-ong mga poste ang paghingpit sa pagbalik sa supply sa kuryente.
Tungod sa pagtakilid sa mga poste ug aron malikayan ang disgrasya, gipatipas sa CCTO traffic enforcers ang trapiko nianang pagkaudto. Nakamugna kini og kahuot sa trapiko sa kasikbit nga mga karsada.
Si CCTO operations head Francisco “Isko” Ouano mao na gani ang nangunay pagdumala sa trapiko.
Nahitabo ang paghuot sa trapiko sa udto ug sa peak hours nianang pagka hapon.