MIHANGAK na si Marman. Paspas ang padayon niyang pagtungas sa mahabog nga bungtod sa Candangas. Wa niya baliha ang pilit-pilit nga singot nga miumog sa iyang lawas. Buot niyang pamatud-an karon sa iyang kahigalaan nga nagduhaduha ug nagtuo nga dili na siya makakatkat o makatungas sa mahabog nga bungtod nga kanhiadto yanuhon lang niya pagtungas isip naandang ehersisyo, ilabi na nga siya ang nabantog nga taas og hangin ug kusog modagan sa ilang baryo nga maoy makadaog sa lumba sa dagan matag pista. Bisan naminyo na sila si Ipen ug nakabaton na og upat ka anak (nga karon pulos na mga propesyunal ug nangaminyo na), padayon siya nga mosalmot sa lumbaanay sa dagan.
Ang iyang mga katalirungan sa baryo nga sila si Edgar, Henry, Boy, Ton ug Ronie, kusog na kaayong mosungog kaniya, daw nagbugalbugal.
“Wa na kay hangin, Mar!” tahimid ni Edgar kaniya.
“Di na ka makatungas sa bungtod, Mar, uy!” kagiki nga katawa ni Henry.
“Bitaw! Hunahuna lang nimo ang nagdako nga makatungas pa ka sa bungtod!” nangyam-id si Boy nga dangason og agtang.
“Kuwang na ka sa ehersisyo sa pagtungas sa bungtod!” namikat si Tom.
“Mohangak na ka, uy!” duhalduhal ni Ronie
Hasta si Ipen nga iyang asawa miprangka sab kang Marman.
“Wa na kay ikabuga sa bisan unsang kinatkatay ug tinungasay, uy, Mar! Wa nay ‘power’ si Manoy!’ ni Ipen nga gisundan sa iyang makantalitahong katawa.
Misamot ang paghangak ni Marman. Apan mipadayon siya karon pagtungas. Kinahanglan nga makaabot gyud siya sa taluktok sa bungtod aron imatuod niya sa iyang mga higala ug kang Ipen nga may ikabuga pa siya sa kinatkatay ug sa pagtungas sa mahabog nga bungtod.
“PAGPUYO diha, Mar, uy! Sus, palumaluma man ka!” kusog nga tingog ni Ipen nga mitukmod kang Marman nga padayong mihangak sa kakutas. “Isul-ob nag balik imong brip ug purol, uy! Wa na lagi kay ikaalagad sa romansa! Wa na tay ikabugang duha! Parehas na tang sitenta anyos, uy!”
Nahiugnok si Marman ug unya nakahimungawong. Nakapanglingo siya nga mitutok sa iyang asawa nga nagdaling misul-ob sa iyang daster, dayon mitakilid paghigda nga nagtalikod kaniya ibabaw sa ilang kama. Sa ibabaw sa bungbong sa ilang lawak ang orasan mitug-an nga alas dose na sa tungang gabii.
Nakapanglingo-lingo si Marman nga nakapanghinol sa dangas sa iyang agtang ug sa upaw na niyang ulo. Sa paglurang sa iyang hangak mibangon siya ug gisul-ob ang iyang brip ug purol. Human mihigda siya tupad sa iyang asawa nga nakapanglingo-lingo gihapon. (KATAPUSAN)