DEAR Noy Kulas,
Good day. Tawga lang ko og Menz, minyo, apan buwag sa bana nga toa sa abroad kay nakapag og laing binuhat. Naa mi duha ka mga anak nga naa na sa senior high. Nagpadala ko nimo ani nga letter kay nakabasa ko og hapit mag same sa akong problema.
Sa una didto ko nagpuyo sa balay sa akong bana pero nibalhin ko kay nakapalit ko og balay. Ang rason nganong nibalhin ko kay akong nakarelasyon ang akong brother-in-law nga maguwang sa akong bana. Dihang na-discover nako nga nagbinuang ang akong bana, siya ang akong nasumbongan sa tanan kay bisan adtong uyab pa mi sa akong husband, friend na mi niya.
Ulitawo siya ug dunay stable job but wa siya makauyab kay mauwaw kuno siya manguyab. Mao to nga sa akong mga kasakit, siya pirme ang akong masumbongan sa tanan until nag transfer ang akong affection sa iyaha.
Yes, duna nay nahitabo namong duha, apan among giseguro nga di ko momabdos. Way nakahibawo aning tanan, kami rang duha, not even my children. Gusto siya nga mo file ko og annulment ug ako ang mogasto aron makaminyo mi.
Noy, maayo kaha ni nga among buhaton? Di ba kaha lain tan awon sa mga tawo nga maora ko og gipasa-pasa sa magsuon? Please tambagi ko.
MENZ
Menz,
Sakto ang unang lakang nga giplano sa imong brother-in-law nga magpa-annul ka sa imong kasal. But ang laing lakang mao ang pagpakigsulti una sa imong bana kabahin sa estado sa inyong kaminyuon, unsay imong panan-aw sa iyang gibuhat ug unsa ang imong pagabuhaton. Gikinahanglan kini tungod kay di ordinaryo nga partner ang imong ipuli, ang iya gyud nga igsuon. Basin maka create na hinuon kini og conflict nilang magsuon ug sa pamilya in general. Dako baya ni nga posibilidad, labina kon mahibaw-an nga siya pa ang mogasto sa imong annulment petition nga ipasaka.
Kon maplantsa na ang tanan, sama pananglit uyon ra ang imong bana sa annulment, diha na kamo mo-proceed sa inyong plano. Inyo bang sultihan ang pamilya sa imong bana? Of course, but mas maayo ang imong brother-in-law ang mo open up ini ngadto sa iyang pamilya, di ikaw. Kon unsa man ang estorya sa iyang pamilya, naa na ninyong duha ang desisyon kon mopadayon ba kamo o di. Timan-i lang, ang tiunay nga gugma molungtad ug mobarog sa bisan unsa nga mga pagsuway.
NOY KULAS