NABAWI ra dayon sa back-to-back defending champion Golden State Warriors ang liderato sa Western Conference human nila gipangmakmak ang host Minnesota Timberwolves, 117-107, kagahapon sa NBA.
Usa ka adlaw human nailog sa Denver Nuggets ang liderato sa Western Conference, ang Warriors wala miusik sa kahigayunan nga mopatigbabaw sila og balik pinaagi sa pagposte og 3-1 nga rekord sa malisod nilang road trip diin upat ka lig-ong teams ang ilang gikaharong.
Lakip sa mga gipangbuntog sa Warriors ning ilahang road trip mao ang Houston Rockets ug Oklahoma City Thunder. Ang bugtong nakapilde lang kanila mao ang San Antonio Spurs.
Ang Warriors mingsaka sa 48-22 nga rekord samtang ang Timberwolves nangatagak sa 32-39 nga baraha.
Gimugna ni Stephen Curry sa 3rd quarter ang 22 sa iyang kinatibuk-ang 36 puntos aron pangulohan ang Warriors, nidugang og 28 puntos si Klay Thompson, niamot og 18 puntos si Jonas Jerebko samtang nihatag og 17 puntos si Kevin Durant.
“If we can do that the rest of the way to the playoffs, we will definitely solidify this No. 1 seed,” matod ni Thompson.
Ning sangkaa, nagpakatap og 39 ka assists ang Warriors unya mirehistro og 19-of-42 sa three-point land.
Ang Timberwolves nga mikombati nga wala sila si Jeff Teague, Derrick Rose, Robert Covington ug Luol Deng nga pulos dunay angol, gipangulohan ni Karl Anthony Towns nga may 26 puntos ug 21 ka rebounds, nihatag og 20 puntos si Andrew Wiggins samtang nitunol og 19 puntos si Josh Okogie.
Samtang mitidlom na usab ang Los Angeles Lakers human kini giunlod og maayo sa Milwaukee Bucks, 115-101.
Si Khris Middleton mipuga og 30 puntos, midugang og 28 si Brook Lopez alang sa Bucks kinsa miduwa nga wala ang sinaligan nga si Giannis Antetokounmpo tungod sa angol sa tikod.
Mitapos usab sa duwa si Nikola Mirotic nga may 23 puntos ug ang Milwaukee misaka na karon ngadto sa 53-18 nga maoy best record karon sa NBA.
Wala usab moduwa si LeBron James sa Los Angeles tungod sa iyang angol ug sa iyang pagpalta si Kentavious Caldwell-Pope maoy miabaga og 35puntos alang sa Lakers. (AP, ESL)