GIKAGUOL sa usa sa mga niretiro sa city hall human nga gikuhaan ang ilang mga benepisyo isip retiradong empleyado kini gumikan na usab sa mga nadawatang mga bonus sa panahon sa kanhi administrasiyon ni Vicente Emano.
Matud sa wala nagpaila nga usa sa mga nakasinati og mga pagminus sa iyang nadawatang benepisyo nga anaa sa P11,000 nga unta wala sila gipalaom ug unta gipahibalo nga kuhaan kini sa ilang madawatan sa panahon nga mo-retiro na.
“Dili man sa pila ang nadawat ani gud ang point man gud is nganong gipaasa man mi kaniadto, ang tanan lugar namo nadawat labi na sa panahon ni Mayor Emano 2010 ko magdahom nga e-deduct diay sa amo pag retire,” matud niini.
Matud usab ni Teodoro Sabuga-a Jr., Acting City Administrator, nga pagpanglingla ang gihimo sa kanhi administrasiyon.
“The act itself committed by the administration of former mayor Dongkoy Emano grabe kadto nga pagpanglingla, pagpanglilngla in the sense gipatoo nimo ang mga empleyado nga naa silay bonus but ang nahitabo diay giluto sila sa ilang kaugalingong mantika,” matud ni Sabuga-a.
Giklaro usab ni Sabuga-a nga dili man ginadili ang paghatag og bonus apan angayang nakasubay kini sa rekisitos gikan sa civil service.
“Pwedi ka man maghatag pero kinahanglan nakasubay ka sa requirement gikan sa civil service so ang nahitabo niadto pakulo lang diay to,” dugang niini.
Giingong ang mga ni-retiro gikan sa 1993 paingon sa 2010 nga dili mominus sa gatos ang nakasinati sa susama niini diin human nakadawat kaniadto og crisis allowance, personnel productivity motivation allowance, rice allowance ug uban pa ang gipangbawas ang retirement benefits og mga anaa sa P11,000.