DILI mominos sa 70 ka mga trabahante sa usa ka construction site nga Altams Construction nga nakakontrata sa katukoran sa San Miguel Corporation ang mireklamo human pabiling gilangan-langan ang ilang sweldo sa Barangay Sta. Ana, lungsod sa Tagoloan, Misamis Oriental.
Gibutyag ni Sta. Ana Kapitan Elmo Ragandang nga nagkasabot ang mga trabahante ug ang employer nga magsweldo sa barangay tungod maayo ang sabot nga sweldohan ang mga trabahante human taod-taod na kining walay sweldo-sweldo.
Saysay ni Ragandang, sa usa ka sibyaan sa radio, nga moabot ngadto sa P150,000 ang balayrunon nga swelduhonon ngadto sa ilang mga trabahante.
Ang construction site gipanag-iyahan sa usa ka Judith Segovia, apan daghan problema sa papeles ug kwarta hinungdan sa pagkalangan.
Dugang ni Ragandang nga buot niyang ultimatuman na kining employer ug sa ilang barangay magbayaran og sweldo kay gibati siya og sobrang kaluoy sa mga trabahante.
Matud sa mga trabahante nga kanunay lang sila ipa cash advance ug hatagan og bugas ug karon maoy ilang gikaguol kay gi-terminate na ang ang maong construction sa maong kompanya ug gidid-an na sa pagtrabaho.
“Mabalaka na hinuon mi nga basin dili gyod hinuon mi ani maswelduhan kay gi-terminate na raba ni nga construction, wala na gitugtan mo-operate,” matud sa usa ka mireklamong trabahante.
Daw ang ilang uban mga kauban nangita na lang og laing mga trabaho tungod dili maayo ang pagsweldo kanila ug ang inisyal nga nagtunol sa ilang sweldo nga partial nga P1,000 kapin ang gitunol lamang ug gisalig sa kusinero taliwala aduna pa silay dawatun unta nga P4,000 ngadto P14,000 sa usa ka trabahante.