USA ka dakong medical mission ang bag-uhay lamang gihimo sa TGP (The Generics Pharmacy) sa Davao City Recreation Center (Almendras Gym), ning siyudad, subay sa selebrasyon sa 82nd Araw ng Davao.
Ang TGP mikuha sa serbisyo sa 16 ka doktor nga miatiman sa 1,224 ka mga hamtong, kabataan ug senior citizen nga pasyente, Marso 17 ning tuig.
Luyo sa tsek-up, nanghatag sab og libreng medisina, meryenda ug daghang freebies ngadto sa mga pasyente.
Atol sa opening program sa aktibidad, si Engr. Ismael Tabije, TGP franchisee sa Davao City, miisplikar nga ang medical mission usa ka nationwide program sa TGP nga maghatag sa libreng medical service sa mga indigent nga pasyente.
Ang gihimo sa Davao mao ang ikatulong hugna sa medical mission nga unang gihimo sa Toledo, Cebu ug Intramuros.
Gitakda sab kining himuon sa Marikina, Benguet, GenSan, Naga, Pasig, Bulacan, Bacolod, Batangas ug Dagupan.
Gidugang ni Engr. Tabije nga pamaagi sab kini aron mapahibalo nila ang kalidad apan baratong tambal sa TGP nga epektibo sama sa branded nga klase.
Ang TGP mao ang pinakadakong network sa mga botika sa Pilipinas nga may sobra 2,000 ka tindahan sa kasamtangan.
Sa Davao City, dunay 29 ka TGP stores.