GITAKDA sa Commission on Elections (Comelec) sa Marso 29 ang pagsugod sa mga kandidato sa lokal nga posisyon sa pagsugod sa ilang kampanya samtang ang mga magpapili alang sa national nga puwesto apil ang Partylist niarangkada na sugod niadtong Pebrero 12 hangtud Mayo 11, 2019.
Kon ang petsa sa pagsugod sa kampanya sa mga kandidato ang atong basihan kinsa kanila ang angayan molingkod aron mosilbi sa katawhan, ambot lang duna ba moy ikatudlo nga kandidato nga mituman ug wa nanikas bisan gamay lang?
Ining bahina atong matuohan ang sulti ni Davao City Mayor Sara Duterte Carpio nga dili na lang himuon nga basihan ang “Honesty” sa pagpili sa kandidato. Ang mga kandidato malapason sab sa pagtuman sa mga balaod.
Kon dili ka manukiduki sa mga ginapanulti sa mga kandidato sa ilang pagpangampanya posible nga madala ka sa ilang mga lansis sa pagpatuo nga mas angayan silang pilion kay sa ilang mga kaatbang. Apan kon nagtan-aw ka sa mga kabag-ohan ubos sa pagdumala ni President Rodrigo Duterte makaingon ka nga dugay ra diay unta ta milambo kon gitarong lang sa mga miagi nga presidente pagdumala ang atong nasud.
Sa dagan sa kampanya karon, mas nakapabor ang mga kandidato nga ubos sa partido sa administrasyon kay sa mga nagsige’g panaway ug nangita unsay sayop sa pagpadagan sa gobyerno. Tungod sa kadaghan sa gihatag nga kabag-ohan, ang katawhan makaingon nga anti-kalamboan ang mga kandidato sa oposisyon hinungdan nga mingaw ug hugnaw ang pagdawat kanila sa katawhan.
Kon kadaghanan sa mga sakop sa senado mosuporta sa mga plano sa presidente, mas hapsay ug paspas pa ang paghatud sa mga proyekto kay sa magsige ug debate panahon sa sesyon aron babagan ang unsa man nga iduso sa administrasyon.
Milabay na ang katuigan sa mga pag-antus tungod sa dili husto nga pagdumala sa atong nasud. Kon masipyat ta pagpili sa mga molingkod sa senado ug sa kongreso mobalik na sab ta pagsugod inay nga mopadayon sa kalamboan. Apan dili sab ta gusto nga mawala na ang ginatawag nga “check and balance” kon wala nay mosupak kay igo na lang pag-uyon ug mahimong itoy kon kinsa ang pangulo.